Skip to main content
bannerra

Gurean Gaur

Eskuz-esku, Eusko Legebiltzarreraino

2018-06-11
Eusko Legebiltzarreraino eraman dute Herritarron Ituna, erabakitzeko 2.019 arrazoi biltzen dituen 130 orrialdeko txostena. Interpelazio argi bat Araba, Bizkai eta Gipuzkoarako Estatutu Berriaz eztabaidatzen ari den Autogobernu lantaldearentzat.
EGUNEKOA: ekainaren 11ko albiste nagusiak

2018-06-11

Donostia, Bilbo eta Gasteiz eskuz esku lotu dituen giza katearen ondorengoei eta Eusko Ikaskuntzak gidatutako herritarren guneei erreparatu diegu albiste politikoetan. Gizarte gaiei dagokienez, berriz, Ongi Etorri Errefuxiatuak plataformak Bilbon egindako protesta eta XXXI. Eskola Txikien festa hartu ditugu aintzat. Nazioarteko eta gureko beste zenbait gairi ere eskaini diegu arreta.

78ko Sanferminetako gertaeren aitorpena egin du Iruñeko Udalak

2018-06-11

78ko Sanferminetako gertaeren 40. urteurrena betetzen delarik, Iruñeko Udalak gertaerak eta horien ondorio lazgarriak pairatu zituztenen aitorpena egin du pasa den ostiralean burututako ekitaldiaren bidez. Udalak 78ko Sanferminen biktimei egiten dien berariazko lehenengo aitorpena dela nabarmendu du Asiron alkateak. Bertan, 78ko Sanferminetako gertaeren inguruan ikerketa taldeak egindako txostena aurkeztu egin zuten.

 

Eusko Ikaskuntzak irailean eramango ditu herritarren guneetako ekarpenak Legebiltzarrera

2018-06-11

Eusko Legebiltzarraren eta Eusko Ikaskuntzaren elkarlanaren ondorioz, «herritarren guneak» antolatu dituzte Bilbon, Donostian eta Gasteizen, Euskal Autonomia Erkidegoko estatutu berrirako oinarrien inguruan eztabaidatzeko. Guztira, 200 lagun inguruk hartu dute parte larunbateko eztabaidetan.

Arlo akademikoa ongi ordezkaturik egon da, eta unibertsitate irakasle asko egon dira batzarrean; haiekin batera, emakume taldeetako ordezkariak, Euskadiko Gazteriaren Kontseiluan biltzen diren elkarteetako kideak, gizarte zibileko bestelako erakundeetakoak eta gaiaz interesa agertu duten herritar soilak ere izan dira bileran.

Hiru ardatzen inguruan eztabaidatu dute: subjektu politikoaz, eskubide eta betebeharrez eta autogobernu mailaz eta beste lurralde eremuekin izan beharreko harremanez. Lan saioan aurkeztu dira Autogobernu Lantaldean talde parlamentario bakoitzak egin dituen ekarpenak Arabako, Bizkaiko eta Gipuzkoako estatutu berrirako. Gero, parte hartzaileak saiatu dira identifikatzen ideia nagusiak eta gutxieneko akordio bat susta dezaketen oinarriak, eta taldeka eztabaidatu dituzte.

Herritarren guneetan agertutako guztiak txosten batera eramango dituzte Eusko Ikaskuntzako kideek, eta txosten hori Autogobernu Lantaldearen esku utziko dute. Sustatzaileek aurreikusi dutenez, irailaren amaieran izango da hori.

Oikiak Aginagari eman dio eskola eta herri txiki bizien lekukoa

2018-06-11

XXXI. Eskola Txikien Festa ospatu dute asteburuan Oikian, ‘Eskola txikiak bizirik, herri eta auzo txikiak bizirik’ lelopean. Bertan izan dira, besteak beste, Cristina Uriarte Lakuako Hezkuntza sailburua eta Markel Olano Gipuzkoako ahaldun nagusia. Hasiera ekitaldian hitza hartu du Uriartek, eta nabarmendu du Oikiako eskolak inguruarekin duen «nortasun eta harreman estua».

Gisa honetako eskoletako irakasleak, Uriarteren arabera, neska-mutilen hezkuntzaz arduratzeaz gain herri eta auzoetako dinamiken parte dira. Eta festa egunean, herri indarra erakutsi dutela nabarmendu dute antolatzaileek, auzolanean antolakuntza bikaina bermatu dutelako. Eskolako zuzendari Itziar Garciarenak haien erakustaldiari aitortu dio balioa.

Bide beretik jo du Jerra Diaz Oikiako eskolako gurasoak ere, eta oso pozik agertu da jendeak izan duen lanerako prestutasunarekin eta parte hartzearekin. 

Ekintza sinbolikoa ere egin dute Gipuzkoako 26 eskola txikietako haurrek: hatz marka koloretsuak jarri dituzte eta haiek erabilita Oikian bizi den Joxean Legorburu artistak eskultura berezia egingo du Oikiako eskola berriaren eraikina
egiten denean bertan kokatu dadin. Uda honetan hasiko dira Oikiako eskolaren handitze lanekin, 2019-2020 ikasturterako amaitzeko asmoarekin.

Azkenik, hurrengo geltokia zein izango den ere argitu da Oikian. 2019an,
Gipuzkoako Eskola Txikien jaia Aginagan ospatuko da, eta igande goizeko ekitaldian hartu dute lekukoa.

175000 pertsona erabakitzeko eskubidearen aldeko giza katean, inoizko mobilizaorik handiena Euskal Herrian

2018-06-10

Arrakasta handia izan du Gure Esku Dagok erabakitzeko eskubidearen alde antolatutako giza kateak. Orotara, 175000 pertsonek parte hartu dute, Euskal Herrian sekula egindako mobilizazioarik handiena. Gehiengo politiko, sozial, sindikal eta asoziatiboak bat egin du ekimenarekin. Hamaika Telebistak zuzeneko saio berezia egin du, mobilizazioaren irudiekin zein hiriburuekin egindako konexioekin.

 
bannerra

bannerra