Skip to main content

Gurean Gaur

Florence and the Machine-ren ikuskizunak Kobetamendi piztu zuen

2018-07-13

Abian da Bilbao BBK Live jaialdia. Lehen egunean, Florence and the Machine kartel buruak dirdira eragin zuen Kobetamendin bildutakoen artean. Hamaika Telebista bertan egon zen eta Rural Zombieseko Julia Urreaga, Morgan-eko Ekain Elorza eta Lukiek-eko Josu Ximun Villelabeitiarekin egoteko aukera izan genuen.

Txell Bonet: “Legitimoak diren eskubideak aldarrikatzeko beldurrik ezin dugu izan”

2018-07-13

Alemaniako justiziak Carles Puigdemont Generalitateko presidente kargugabetuari matxinada delitua egoztea baztertu ondoren, gainerako auzipetuen abokatuek prentsa agerraldia egin dute datorren astean askatasun eskaerak egingo dituztela jakinarazteko. Etor daitekeenaz ez pentsatzea nahiago du Txell Bonetek, Omnium Culturaleko presidente Jordi Cuixarten bikotekideak.

Saioa Baleztenak hitz egin du harekin, eta Bonetek gogora ekarri du eskubide urraketak jasan dituzten katalan anonimo asko eta asko ere badaudela, eta ezin dutela aldarrikapen legitimoak egiteko beldurrez egon

DYA Gipuzkoak 45. urteurrena ospatuko du

2018-07-13
45 urte betetzen ditu aurten Gipuzkoako DYAk. Igandean Donostiako Sagues zabalgunean ate irekien jardunaldia antolatu dute urteurrena ospatzeko eta guk Maialen Carrion Gipuzkoako DYAko Idazkari Probintzialarekin hitz egiteko aprobetxatu dugu. Erakundeak izan dituen aldaketei buruz, aurrera eramaten dituzten jardueren inguruan eta boluntarioen garrantziari buruz hitz egin dugu berarekin, besteak beste. Erakundearen sorrerari buruz hitz egitean, DYAko lehen elkartea Bizkaian sortu zela kontatu digu Carrionek.Gipuzkoako DYA probintziako errepideetan laguntzeko zerbitzu gisa sortu zela ere azaldu digu. 45 urteko ibilbidean gauza asko aldatu dira eta gizartearen beharretara egokitzen saiatu direla esan digu Carrionek. Jendeak DYA anbulantziekin soilik erlazionatzen du gehienetan, baina gizarteari askoz zerbitzu gehiago eskaintzen dizkiotela azaldu digu erakundeko idazkariak. Eskaintzen dituzten zerbitzuen artean, askorentzat ezezaguna den bati buruz galdetu diogu, Nahia Programa interesgarriari buruz. Elkarteak RCP edo Bihotz Biriken Suspertzearen inguruko ekimen asko antolatzen ditu urtean zehar. Herritarron artean teknika hauen garrantzia guztiz barneratuta dagoen edo oraindik kontzientziazio lan handia egin behar den galdetu diogu Carrioni. Gipuzkoako DYAk Donostian du bulego zentrala, baina probintzia osoko hainbat herritan banatuta daude ordezkaritza ezberdinak. Denen artean koordinatzeko irratia erabiltzen dutela azaldu digu. Gipuzkoan 500 bat boluntario daudela esan digu Carrionek, eta bolondres izateko zer ezaugarri izan behar diren galdetu diogu.Elkartearen finantzazioaren oinarria bazkideak direla azaldu digu, eta haiei esker eta haientzat lan egiten dutela kontatu du. Bukatzeko, igandean antolatutako festaren inguruan hitz egin dugu. Behar ditugunean hor egoteko esfortzua egiten duten boluntario hauei asko zor diegu. Errepidetan, jende asko biltzen den ekitaldietan edota ikastoletan, beti laguntzeko prest. Urteurrenagatik zorionak denoi eta egunero egiten duzuen lanagatik eskerrik asko denon partez. Bejondeizuela eta jarraitu horrela!
Ustezko iruzurraren aurrean, Osakidetza eta Jaurlaritzaren "konplizitate eta pasibotasuna" salatu du ELAk

2018-07-13

Gertatutakoa ikertu, irregulartasunak argitu eta ardurak zehaztu ez ezik, arazoaren muinera joan behar dela uste du EH Bilduk, eta lan eskaintza eta giza baliabideetako politika eredu berria eskatu du gaur.

Euskal Herriak nor izan nahi duela aldarrikatuko dute Tourrean

2018-07-13

Ekimenaren sustatzaileek jai gune bat antolatu dute erlojupekoaren ibilbideko 14. kilometroan, Uztaritze eta Zuraide artean, eta asmoa 12.00etan mosaiko handi bat egitea da.

Hori ez da baina asmo bakarra izango, ibilbidean barrena “You are in The Basque Country. Euskal Herria helmuga” lelodun afixak banatuko dituzte. Donostian aurkeztu dute egitaraua, eta, besteak beste, Mikel Astarloza, Miguel Mari Lasa eta Txomin Perurena txirrindulari ohien babesa jaso dute, eta Aritz Bagues Muriaseko txirrindulariarena.

Egitasmoa abian jartzeko boluntarioak ere beharko dituzte, eta laguntzeko prest dagoen orok www.Tourra.eus webgunean eman dezake izena. Era berean, mosaikoan parte hartu nahi duenak aurretik izena ematea eskertuko lukete, webgunean ere bai. Festagunea bezperatik irekiko dute, eta bertan taberna eta animazioa egongo da. Lasterketa jarraitzeko pantaila erraldoia ere egongo da. Zaleei bezperatik joatea gomendatu diete, erlojupekoaren egunean 09:00etan itxiko baitituzte errepide gehienak.

Mosaikoa eta afixa banaketa 28an izango da, eta astebete lehenago bizikleta martxa antolatu dute erlojupekoaren ibilbidea egiteko. Irteera goizeko 10.00etan izango da, Senpereko Utsalea aparkalekuan. Osatzen den multzoarekin ibilbidea egingo dute, Ezpeletaraino. Behin bukatuta, autoa Senperen utzi duenak 11 kilometro ditu irteera punturaino.

'Erlauntza', lagun arteko asteburu eroa

2018-07-13

Umetako lagun koadrila bat asteburu pasa joango da landetxe batera, haietako baten ezkon aurreko agurra ospatzeko. Elkarrekin egon gabeko urteek, ordea, eragina ziango dute eta elkarren arteko lotura estua sentitu arren, ezer ez da garai batean bezalakoa izango.

Asteburu "eroa" izan behar zuena, beraz, are gehiago erotuko da: trapu zaharrak astinduko dituzte, esan gabeko eta lehen ere esandako gauzak esaten hasiko dira, eta tartean sartuko dira alkohola, drogak eta erlauntza bat ere. Horrek eman dezake obraren nondik norakoen berri, esaten delako erleak direla animalien erreinuan ondoen komunikatzen direnak. Eta esaten da dantzan komunikatzen direla ere.

Beraz, Donostiako Victora Eugenia antzokian Erlauntza ikusi nahi duenak uztailaren 18tik 22ra arteko aukera izango du, sarrerak 15 eurotan eskuratuta. 18tik 20ra, 20:00etan eskainiko dute; 21ean, 20:00etan eta 22:30ean; eta 22an, 19:00etan.

 
bannerra

bannerra