Skip to main content

Azken bideoak: Kultura

bideoa prestatzen
'Zendabalitz' eleberria idatziko du Erika Elizarik, XXI. Igartza sariari esker

2018-09-12

Erika Elizarik izango du aukera XXI. Igartza saria baliatuta ‘Zendabalitz’ eleberria idazteko. Hamabi proiektu izan dira aurtengo Igartza sariketara aurkeztu dituztenak eta horien artetik Elizarirena aukeratu du Miren Amurizak, Igor Estankonak eta Garazi Kamiok osatutako epaimahaiak. Pozik hartu du berria Elizarik, baina argitu du beretzat berria den mundu batean murgiltzera doala.

Momentu oso konkretutik abiatuko da ‘Zendabalitz’ liburuko istorioa. Arazo tekniko bategatik aireratu ezin duen hegazkin bat irudikatu du, eta bertatik atera ezinda geratutako bidaiarien burutazioek harilkatuko dute kontakizuna.

Egoera horretan, bidaiariei sortzen zaizkien kezketan jarri du fokua Elizarik, hain zuzen, iraganari edo geroari lotutako beren gogoetetan. Zehazki, zazpiren istorioak tartekatuko ditu eleberrian, haien barne bakarrizketetan jarriko du arreta.

Beasaingo Udalak, CAF enpresak eta Elkarrek antolatzen dute Igartza saria, idazle gazteei proiektu bat garatzeko aukera ematen diena. 21. aldia du aurtengoa. Dena ondo bidean, ‘Zendabalitz’ eleberria urte eta erdi barru argitaratuko du Elkar argitaletxeak.

bideoa prestatzen
Aurrerapena: Joli Pascualena, umorea bidelagun

2018-09-16
Irailaren 16an, 21:00etan, Joli Pascualenarekin, bera berpizten duen baratxuri zopa prestatuko dugu. Bere ibilbidea, zailtasunak eta garaipenak komentatzen ditugun bitartean sorpresak ere jasoko ditu gure gonbidatuak.
bideoa prestatzen
Kuttunena duen generoa baliatu du Iban Zalduak bizitzaz aritzeko

2018-09-11

Literaturaren bidez bizitza errealean esaten ez diren gauzak esaten saiatu da Iban Zaldua, 'Sekula kontatu behar ez nizkizun gauzak' ipuin bildumarekin. 32 ipuin eta kontrazalekoa bildu ditu aurkeztu berri duen liburuan. Egunerokoaren barrunbeak bilatzen ahalegindu da fantasiari zirrikitu bat irekita.

Ipuin horien bidez, Zalduak bikoteen arrakaletan arakatu du, euskal gatazkari geruza berriak bilatzen dizkio, elkarrizketa-bidezko ipuinak sortu ditu, txosten gisakoak, jostalariak, dramatikoak zein ironikoak. Xabier Mendiguren Elizegi Elkar argitaletxeko editorearen esanetan, "fikzioaren festa bat" da Zalduaren azken liburua eta trebezia aitortu dio idazleari. Zalduak berak azaldu du errealitateari buelta ematen ahalegindu dela.

Zalduak Ana Malagon idazlearen eta Aitor Arregi zinemagilearen laguntza izan du aurkezpenean. Malagonen ustetan, familietako disfuntzioak oso ondo islatu ditu Zalduak. Arregik, berriz, gatiasun berezia aitortu dio idazleari egoera arruntetan elementu ez hain arruntak sartu eta deserosotasuna eragiteko.

bideoa prestatzen
Iruñeko Batasun Pribilegioaren 595. urteurrena

2018-09-08
Iruñeak Batasun Pribilegioaren 595. urteurrena ospatu du asteburuan. San Nikolas, San Zernin eta Nabarreriako burgoak batu eta egungo Iruñearen sorrera izan zena, alegia. Asteburu batez hiriak Erdi Arora salto egin du orduko artisau azoka eta Alde Zaharreko kaleetan barna zebiltzan bufoi eta juglareei esker. Horiekin batera, kaleak musikaz bete dira, Iruñeko Orfeoia eta La Pamplonesa musika bandaren eskutik.
bideoa prestatzen
Alexander Payne izango da epaimahai ofizialeko burua Zinemaldian

2018-09-07
Epaimahaikideen eta etorriko diren aktore eta zuzendarien berri eman du jaialdiak. Bi aste baino ez dira geratzen Donostiako Zinemaldia has dadin.
bideoa prestatzen
Itsas korronteak bustiko du aurtengo Atlantikaldia

2018-09-06

Irailaren 20tik 23ra izango da Atlantikaldiaren bosgarren edizioa Errenterian, eta antolatzaileen hitzetan, “Itsas korronteek” bustiko dute aurtengo jaialdia.

Ohikoa denez, jaialdiak bi ardatz nagusi izango ditu: kultur topagunea eta musika jaialdia. Beraz, kulturen arteko elkartrukea ahalbidetuko du, Errenteriako eta herritik kanpoko eragileen arteko elkarlanaren biez. Musika jaialdiari dagokionez, berriz, bertako eta kanpoko artisten elkarlanetik sortutako emanaldi bereziak eskainiko dira.

Donostiako Aquariumean egindako aurkezpenean esan dutenez, herritarrek eta herritarrentzat egindako jaialdia izaten jarraitzen du Atlantikaldiak. Errenteriarrek ematen diote nortasuna jaialdiari, eta euren parte-hartzea sustatu nahian, aurrekoetan bezala, udalak herritarren proposamenekin osatu eta aberastu du aurtengo kultur programazioa. Ia 100 kultur ekintza jasotzen dituen egitaraua sortu dute hala.

Oiartzun ibaiaren inguruan egingo dute jaialdia, eta hainbat gune berezi prestatuko dituzte Itsas Topaleku izenburupean. Aurtengo berrikuntza moduan, gainera, Gastrogunea izendatutako espazioa nabarmendu dute.

Agertoki nagusia, berriz, Lehendakari Agirre plazan kokatuko den Itsasargi Nagusian egongo da. Musika izango da gune horretako; izan ere, oholtza gainean izango dira Nneka, Bebe, Esne Beltza edo 47Soul bezalako talde handiak. Gainera, hainbat hizkuntza, kultura eta jatorritako artistak, nazioartekoak eta Euskal Herrikoak, elkarlanean arituko dira kolaborazio eta ‘Itsas elkarrizketa’ izendatutako egonaldietan.