Skip to main content

Azken bideoak: Gobernua

bideoa prestatzen
Nafarroak 113 milioi euro inbertsio publikoetara bideratuko ditu

2018-09-21
Nafarroak 113 milioi euro bideratuko ditu inbertsio publikoetara. Hain zuzen, iaz Nafarroak lortu zuen superabitaren erdia da; gainontzekoa zorra amortizatzeko erabiliko baita. Guztira 215 milioi euroko superabita lortu zuen Nafarroak. Iraunkortasunaren legearen arabera diru hori zorra ordaintzera zuzendu behar bada ere, zirrikitu bat aurkitu du laukoak inbertsio jasangarriak egiteko. Atzo bertan erregistratu zuten Foru Lege Proposamena eta urriaren 4rako onartzea espero dute.
bideoa prestatzen
Estatus berriarekiko desadostasunak politika orokorreko saioko ardatz

2018-09-20

Estatuaren izaera plurinazionala onartu, eta Gernikako Estatutua betetzeko eskatu dio Iñigo Urkullu Eusko Jaurlaritzako lehendakariak Pedro Sanchez Espainiako Gobernuko presidenteari.

Autogobernu lantaldean adostutakoa zabaltzearen alde dago Jaurlaritzako lehendakaria, baina aurrena, onartuta dagoena bete behar dela nabarmendu du.

Akordioa nahi du Urkulluk, eta autogobernurako eskumen gehiago izatea. Espainiarekin errespetuzko aldebiko harremana izateko, berriz, "ahalik eta esparru zabalenera eramango dituen bidea" topatzeko ahalegina egin die legebiltzarreko gainerako taldeei.

Goizean, Eusko Legebiltzarrean egindako politika orokorreko saioan egin ditu hitz horiek Urkulluk. Arratsaldeko saioan, hari erantzuteko aukera baliatu dute alderdiek, eta autogobernuarena izan da, nola ez, ardatzetako bat.

PPko bozeramailea Alfonso Alonsok, esaterako, mehatxuka ari ote den galdetu dio lehendakariari. PSEren izenean, Idoia Mendiak autogobernuaren inguruan akordio zabalagoak bilatzera jotzea beharrezkoa dela esan du. Maddalen Iriarte EH Bilduko bozeramaileak, berriz, herri akordioetarako prest daudela baieztatu du, baina baita EAErako estatus berriaz jeltzalek eta koalizio abertzaleak adostutakoa herritarrentzat ona dela ere.

bideoa prestatzen
Arrakalak eragin dituzte lauko alderdian Maravillas gaztetxearen inguruko gertaerek

2018-09-12
Gaztetxeen loraldi bat eman da azkenaldia Nafarroan. Iruñeko Alde Zaharreko Maravillasekin batera, Arrotxapean, Tafallan, Lizarran, Burlatan, Berriozarren edota Mendillorrin sortu dituzte gaztetxeak. Horietako gehienetan, Udalekin egindako akordioei esker aurrera atera dira proiektuak. Maravillas gaztetxearen inguruko gertaerek Gobernua sostengatzen duen laukoan arrakalak eragin dituzte.
bideoa prestatzen
EH Bildurekin adostutakoarekin jeltzale "denak" ados daudela ziurtatu du Erkorekak

2018-09-05

Eusko Jaurlaritzako bozeramaile Josu Erkorekak esan du EAJn denak daudela ados EH Bildurekin estatus berriaz adostutako oinarriekin. Izan ere, Iñigo Urkullu Eusko Jaurlaritzako lehendakariak astelehenean adierazi zuen "aztertu" beharra dagoela EAJk eta EH Bilduk adostutako edukiak, baina oinarri horiei ez zaiela uko egin behar. Erkorekak argitu du ez dagoela "sakoneko desberdintasunik" bi iritzien artean.

Akordioan parte hartu duen koalizioko koordinatzaile Arnaldo Otegi Bruselan da, Abdullah Öcalan buruzagi kurdua aske uztea eskatzeko ekitaldi batera joanda. EH Bilduko ordezkariak han hartu du hitza eta esan du EAJrekin egindako akordioak “Araba, Bizkai eta Gipuzkoako herritarren gehiengoaren sentimendu politikoarekin” konektatzen duela.

Jeltzaleen kritiketako bat izan da PSE-EEk eta PPk ez dituztela beren jarrerak moldatu akordio bat errazteko. Kritika horri, ordea, gaur erantzun dio Idoia Mendia PSEko idazkari nagusiak. Esan du sozialistak "jada mugitu" direla estatutua erreformatzea onartuta.

PP ere agertu da EAJren eta EH Bilduren akordioaren kontra. Alfonso Alonso presidenteak jakinarazi duenez, PPk egitasmo bat aurkeztuko du Eusko Legebiltzarrean, EAJk akordio horretan "atzera" egin dezan, popularrek ikusten duten arriskuari aurre hartzeko.

bideoa prestatzen
Kataluniaren aldeko martxara deitu du Torrak, konponbide bakarra autodeterminazioa delakoan

2018-09-05

Datozen hilabeteetarako independentisten bide orria azaltzeko egindako hitzaldian, Quim Torra Generalitateko presidenteak proposamena egin du: «Kataluniaren eskubide zibilen, sozialen eta nazionalen» aldeko martxa bat egitea proposatu du. Horrez gain, Pedro Sanchez Espainiako Gobernuko presidenteari erantzun dio autodeterminazio erreferendum batek «soilik» konponduko duela auzia.

Torrak asteartean adierazi zuenez, «herritarrek» lortzen dituzte errepublika edota subiranotasuna, “ez datoz bulegoetatik”. Ba herritar horiei zuzendu zaie Generalitateko presidentea, eta aipaturiko martxa egitea proposatu die. Zehaztasunik ez du eman Torrak, baina asteak daramatza «etenik gabeko mobilizazioetarako» deia eginez, ezinezkoari irabazteko gonbita egin du.

Maila instituzionalean, berriz, Torrak argi asko erantzun dio Espainiako Gobernuko presidenteak bezperan egindako proposamenari. Gatazka politikoa konpontze aldera, autogobernuari buruzko erreferendum bat proposatu du Sanchezek. Generalitatekoak areago joan nahi du, ordea. Autodeterminazio erreferenduma da Torrak hobesten duena.

Torraren hitzaldia bukatu eta berehala, Isabel Celaa Espainiako Gobernuko bozeramailea agertu zen hedabideen aurrera. Haren erantzuna Generalitateko presidenteari: independentistek ez dutela «gehiengo sozialik». Hala ere, Celaak ez dio autogobernuari buruzko elkarrizketari biderik itxi.

Independentista katalanen aldetik ere etorri dira erreakzioak Torraren hitzaldiaren ondoren. Dirudienez, Generalitateak aldebakarreko bideari muzin egiten baitio. Hori da, hain justu, ERC Esquerra Republicanak momentu honetan eskatzen duena. CUPeko Carles Rierak TV3n esan duenez, kontraesanak daude Torraren hitzetan. Rieraren hitzetan, ezin da gizarte mobilizaziorik deitu, Espainiako Konstituzioak ezarritako arauetatik irteteko prestasunik gabe.

Urak mugituta ekin diote katalanek ikasturte politikoari. Hain justu, Xavier Domenech Catalunya En Comuko liderrak dimititu egin du. Beraz, bai Kataluniako Parlamentuan zuen diputatu aktari, baita gainontzeko kargu politikoei ere uko egin die. Politikoki eta pertsonalki «akituta» dagoelako hartu du erabakia.

bideoa prestatzen
Joxe Mari Esparza: “Elizaren inmatrikulazioena lapurreta historikoa da”

2018-09-03
Elizak inmatrikulatu dituen ondareen zerrenda publikatuko du Espainiako Gobernuko Justizia Ministerioak. Balorazio positiboa egin du Nafarroako Ondarearen Defentsarako Plataformak, inmatrikulazioen berri lehenengo aldiz eman zuena estatu mailan, alegia. Plataformako kide Joxe Mari Esparzak Hamaika Telebistari eskainitako elkarrizketan adierazi du 10 urte behar izan direla Espainiako Gobernuak Elizaren inmatrikulazioen zerrenda publikatzeko, Nafarroan 15 egunetan lortu egin zena. Zerrendak 1998tik 2007ra Elizak bere izenean jarritako ondareak jasotzen ditu, Aznarren gobernuak legea aldatu zuen unetik, alegia, Elizak nahi zituen ondareak bere izenean errejistratzeko aukera eman ziona. Esparzak salatu duenez, “sekulako lapurreta historikoa” izan da.