Skip to main content
bannerra

Azken bideoak: Literatura

bideoa prestatzen
Zeri kantatzen diogu euskaldunok?

2018-10-09
Hitzen ahairea izenburu du Gotzon Barandiaranen azken lana eta galdera bat dakar: Zeri kantatzen diogu euskaldunak? Hortik abiatuta, euskal kantagintzaren inguruko hausnarketa plazaratu du idazleak. Hain zuzen ere, idazleen testuetatik abiatutako kantak izan ditu aztergai obran.
bideoa prestatzen
‘Gerezi garaia’, Belatz komikigilearen azkeneko eleberri grafikoa

2018-09-28
Belatz komikigile iruindarrak Lucio Urtubiaren bizitza kontatu du ‘Gerezi garaia’ bere azkeneko eleberri grafikoan. Lan berriak prestatzeari ekin dio dagoeneko eta, une honetan, bere irudietako batzuk Nafarroako Komikiaren IX. Azokan ikus daitezke, Iruñeko Kondestablearen jauregian.
bideoa prestatzen
'Zendabalitz' eleberria idatziko du Erika Elizarik, XXI. Igartza sariari esker

2018-09-12

Erika Elizarik izango du aukera XXI. Igartza saria baliatuta ‘Zendabalitz’ eleberria idazteko. Hamabi proiektu izan dira aurtengo Igartza sariketara aurkeztu dituztenak eta horien artetik Elizarirena aukeratu du Miren Amurizak, Igor Estankonak eta Garazi Kamiok osatutako epaimahaiak. Pozik hartu du berria Elizarik, baina argitu du beretzat berria den mundu batean murgiltzera doala.

Momentu oso konkretutik abiatuko da ‘Zendabalitz’ liburuko istorioa. Arazo tekniko bategatik aireratu ezin duen hegazkin bat irudikatu du, eta bertatik atera ezinda geratutako bidaiarien burutazioek harilkatuko dute kontakizuna.

Egoera horretan, bidaiariei sortzen zaizkien kezketan jarri du fokua Elizarik, hain zuzen, iraganari edo geroari lotutako beren gogoetetan. Zehazki, zazpiren istorioak tartekatuko ditu eleberrian, haien barne bakarrizketetan jarriko du arreta.

Beasaingo Udalak, CAF enpresak eta Elkarrek antolatzen dute Igartza saria, idazle gazteei proiektu bat garatzeko aukera ematen diena. 21. aldia du aurtengoa. Dena ondo bidean, ‘Zendabalitz’ eleberria urte eta erdi barru argitaratuko du Elkar argitaletxeak.

bideoa prestatzen
Kuttunena duen generoa baliatu du Iban Zalduak bizitzaz aritzeko

2018-09-11

Literaturaren bidez bizitza errealean esaten ez diren gauzak esaten saiatu da Iban Zaldua, 'Sekula kontatu behar ez nizkizun gauzak' ipuin bildumarekin. 32 ipuin eta kontrazalekoa bildu ditu aurkeztu berri duen liburuan. Egunerokoaren barrunbeak bilatzen ahalegindu da fantasiari zirrikitu bat irekita.

Ipuin horien bidez, Zalduak bikoteen arrakaletan arakatu du, euskal gatazkari geruza berriak bilatzen dizkio, elkarrizketa-bidezko ipuinak sortu ditu, txosten gisakoak, jostalariak, dramatikoak zein ironikoak. Xabier Mendiguren Elizegi Elkar argitaletxeko editorearen esanetan, "fikzioaren festa bat" da Zalduaren azken liburua eta trebezia aitortu dio idazleari. Zalduak berak azaldu du errealitateari buelta ematen ahalegindu dela.

Zalduak Ana Malagon idazlearen eta Aitor Arregi zinemagilearen laguntza izan du aurkezpenean. Malagonen ustetan, familietako disfuntzioak oso ondo islatu ditu Zalduak. Arregik, berriz, gatiasun berezia aitortu dio idazleari egoera arruntetan elementu ez hain arruntak sartu eta deserosotasuna eragiteko.

bideoaren irudia
Bizitzako kolpeei erantzunez, aurrera

2017-06-15

"Eskularru beltzak" du izena Jasone Osororen lan berriak. Gaztetxoei zuzendutako lau liburukik osatzen duten bilduma baten lehena da, eta boxeoa izango da horiek harilkatuko dituen gaia.

bideoaren irudia
Begiradak komikietan, emakumeen komikiak eta komiki feministak

2017-06-12

Emakumeen komikiak eta komiki feministak. Horien gaineko begiradak jasotzen dituen erakusketa baten inguruan hitz egin digu Josune Muñoz Skolastika elkarteko kideak. Donostiako Komikigunean erakusketa du ikusgai ekainaren 16ra arte.