Skip to main content
bannerra

Skapa | Banaka banaka erortzen diren maluten bila


Lehen atalean, ondokoak nabarmendu ditugu: Siroka musika taldeak banaka-banaka erortzen joango diren "Malutak" iragarri ditu. Ondoren, zinema estreinaldiei begira jarri gara. Asteburuko proposamenei dagokienez hauxe gure eskaintza: Bilbok Zentsura At! Jaialdia hartuko du, Baionan gauzatuko da  Xilaba bertsolari txapelketa, Getxon Manga azoka izango duzue asteburuan eta Zinebi Jaialdiko nobedadeak Bilbon izango dituzue ikusgai. Gainera, Koiu musika taldea ezagutzeko aukera izan dugu.


Ertzak

Europako hizkuntza gutxituen ituna izan dugu hizpide. Espainiak aipatu karta berretsi du, baina Frantziak berresteko eztabaida ireki zuen. Hain zuzen ere, estatu frantsesak 99an izenpetu zuen ituna. Baina konstituzio kontseiluak Frantziako konstituzioa urratzen zuela jakinarazi zuen eta ordutik berretsi gabe dago. Estatuek konpromiso zehatzak hartzen dituzte hizkuntzarekiko, baina itunak ez ditu hizkuntza eskubideak bermatzen. Horiek horretan, zer da zehazki Europako hizkuntza gutxituen karta? Onuragarria da euskararentzat? Horri buruz aritu gara Andres Urrutia (Euskaltzaindia) eta Paul Bilbaorekin (Kontseilua).


Esatea Libre

Azaroaren 9an 2.300.000 pertsonak hartu zuten parte Kataluniako kontsultan, hori izan dugu aztergai aste honetan, baina baita Yolanda Barcina UPNrekin hauteskundeetara ez aurkezteko erabakia ere. Gurekin izan ditugu Aitor Azurki (kazetaria), Ion Telleria (Naizeko kazetaria) eta Iñaki Petxarroman (Berriako zuzendariordea).

Ibilean

125 urte herritarrentzako itxita egon den Abaroa gunea auzolanaren bidez zabaltzeko ibilbide luzea hasi dute Lekeition. Asmoa herritar guztion artean Abaroa gunea berreskuratzea da, eraikinak izan behar duen erabilera zehaztuz. Asanblada eratu eta astero astero herritarren nahi eta beharren inguruan eztabaidatzen dute Lekeition. Azaroaren 8an Abaroa Kultur Jaia antolatu zuten, Lekeitioko kultur, kirol eta eragile sozialen topaleku izan zan jaia eta baita Abaroa izan daitekeenaren aurrerapen txikia ere.


Hona Hemen

Gure Esku Dago dinamikak antolatutako mosaikoak arrakasta ikaragarria izan du. Donostiako Zurriola hondartzan eginiko ekimenak nabarmen gainditu ditu aurreikusitako zifrak. 5 mila lagunen parte hartzea espero zen hastapenean, eta 10 mila lagun elkartu dira erabakitzeko eskubidearen aldeko ekimen ikusgarrian.

 
bannerra

bannerra