Europako Inbertsio Bankuaren (EIB) administrazio-kontseiluak asteazken honetako bileran erabaki zuen 200 milioi eurorainoko mailegua ematea Getxo eta Portugalete artean eraikiko den tunel handiaren proiektuari. Proiektu horretan, Bizkaiko Foru Aldundiak 450 milioi euro inbertituko ditu, hasieran aurreikusitakoa baino 50 gehiago.
Imanol Pradales Azpiegitura eta Garapeneko foru diputatuak hitzarmenaren berri eman du, bere planen berme garrantzitsua baita, eta aurreratu du otsailean Gobernu Kontseiluak behin betiko eraikuntza-proiektua onartuko duela, 2024ko udan obrak hasi ahal izateko, lau urtez luzatuko baitira.
Gobernu Kontseiluaren osteko agerraldian, Pradalesek nabarmendu du garrantzitsua dela EIBk hartutako erabakia; izan ere, urte bat behar izan du finantzaketa-eskaerari buruzko iritzia emateko, eta kontuan hartu du azpiegitura berriak Itsasadarraren bi ertzen arteko bide-sarearen «zaurgarritasuna» konpondu nahi duela, Rontegiko zubitik, egunero 165.000 ibilgailu inguru ibiltzen baitira handik. Gaineratu du tunel handiarekin puntu kritikoetako zirkulazioa murriztuko dela.