EH Bilduk 2025eko aurrekontuetarako akordio orokor baterako proposamena aurkeztu du, Araban, Bizkaian eta Gipuzkoan "premiazkoenak diren egiturazko arazoei heltzeko". Ekimen honek gazteen emantzipazioa, zaintza, etxebizitza eta trantsizio ekosoziala bezalako gaiak jartzen ditu erdigunean, "orain arte herritarren beharrei erantzun egokirik eman ez dieten politika publikoen norabidea zuzentzeko" helburuarekin.

Donostian aurkeztu dute proposamena, eta bertan izan dira Pello Otxandiano Eusko Legebiltzarreko oposizioko burua eta Eva Lopez de Arroyabe, Iker Casanova eta Maddalen Iriarte ezker subiranistaren Arabako, Bizkaiko eta Gipuzkoako bozeramaileak.

Ziur agertu dira 2025eko aurrekontuen inguruan "elkarrizketa fase bat" hasiko dela eta bilerak eskatu dizkiete EAJri eta PSE-EEri.