Arabako, Bizkaiko eta Gipuzkoako Ogasun eta Finantza diputatuek agerraldia egin dute Batzar Nagusietan, berrikuspen fiskalaren egoeraren berri emateko. Arduradunen esanetan, "hiru lurraldeen erronka komunei erantzutera bideratutako proposamen harmonizatua aurkeztu dute".

Hainbat neurri proposatu dituzte, Araban, Bizkaian eta Gipuzkoan etxebizitza eskuratzea sustatzeko, hala nola hobariak PFEZan. Berritasun nagusien artean, PFEZa aitortzeko betebeharra urteko errenta 19.000 euroraino igotzea proposatu dute (Lanbide arteko Gutxieneko Soldata baino handiagoa, 2024an 15.876 eurokoa dena). Halaber, etxebizitzaren arloan alokairua bultzatzea dute helburu, zerga-pizgarriak indartuz alokairu eskuragarriaren eskaintza handituta. Halaber, proposatu dira sozietateen gaineko zergaren kenkariak, garapen jasangarria, ingurumenaren kontserbazioa eta hobekuntza edo ekonomia zirkularra helburu duten proiektuei lotutako inbertsio eta gastuengatik.

EAJk eta PSE-EEk gehiengo osoa dute Bizkaiko Batzar Nagusietan zerga erreforma aurrera ateratzeko. Araba eta Gipuzkoan, berriz, oposizioaren babesa beharko dute. Hiruetako baten aldeko botoa nahikoa litzateke.