COVID-19aren izurriak hilgarritasun tasa altua utzi zuen EAEko zahar etxeetan: kutsatutako bost adinekotik bat zendu zen gaitzaren ondorioz. Eusko Jaurlaritzak txosten batean bildu duenez, hilgarritasun tasaren eta zentroetako langile kopuruaren arteko lotura berretsi du. Aintzane Orbegozo Gipuzkoako adinekoen etxeen ELA sindikatuko arduradunak azaldu du ez dela ratioaren eta zaintzaren arteko lotura berresten duen txosten bakarra. Salatu du datu hauek txostenean bildu ostean ez dela egon “inolako autokritikarik”, hori egiteak zaintza sistema eredua “kolokan” jarriko lukeelako, “hain zuzen, politikariek nahi ez dutena”.