Euskal Udalekuek elkartasun-jaialdiko egitaraua argitaratu dute. Izan ere, azken urtean proiektuak bizi izan duen auziaren baitan, Sarreak aurten ez du udalekurik antolatu; haien hitzetan, udalekuetako eskaintza segurua bermatzea ezinezkoa izango litzatekeelako, beldurrik, mehatxurik eta oztoporik gabeko baldintzetan.

Hala ere, udalekuen ordez elkartasun-jaialdia antolatu dute aurten Bernedon. 14:00etan hasiko da, Sustrai Colina eta Miren Artetxerekin egingo duten bertso-bazkariarekin. Arratsaldean, pailazoen emanaldia eta udalekuetatik abiatuko den elektropottotea izango dira, besteak beste.

Gauean, 20:00etan ekitaldia egingo dute frontoi-plazan, eta ordu erdi geroago hasiko dira kontzertuak: Eñaut Elorrieta, Ines Osinaga, Jon Basaguren eta Yogurinha Borova arituko dira. 22:30ean, berriz, Bele Raven izango da oholtza gainean.
Jaialdira joateko aukera errazteko, autobusa jarriko dute. 12:30ean abiatuko da Gasteiztik Bernedora, eta jaialdia amaitzean itzuliko da hiriburura. Abuztuaren 29an izango da hitzordua, Euskal Udalekuen proiektuari babesa eta elkartasuna adierazteko.