Irune Berasaluze Gobernantza diputatuak aldundiak euskararekiko duen konpromisoa baieztatu du. Astearte honetan gobernu kontseiluaren osteko agerraldian, epaiaren aurka egingo dutela adierazi du. Pasa den astean Donostiako epaitegi batek Kabiaren hizkuntza eskakizunak “gehiegizkoak” direla ebatzi zuen. Bi langilek oinarrizko eskubideak urratu izana argudiatuta, erakundea salatu zuten. Epaileak arrazoia eman die. Ondorioz, bertan behera utzi du 2022an Kabiak onartutako 54 zaintzaile egonkortzeko deialdia.