SATSE sindikatuak jakinarazi duenez, Osakidetza berriro zigortu dute greba eskubidea urratzeagatik: bi sententzia jaso ditu aurka, Galdakaoko ospitalean eta Uribe eskualdeko osasun etxeetan “gehiegizko gutxieneko zerbitzuak” ezartzeagatik.

Ohar baten bidez, SATSEk gogorarazi du Osakidetza zigortu egin zutela pandemian zehar sindikatuekin ez negoziatzeagatik; iaz, berriz ere kargu hartu zioten judizialki, Mahai Sektorialean Erizaintzako Sindikatuarekin enpleguaren egonkortasunari buruz lortutako akordioak ez errespetatzeagatik, eta 2022ko apirilean, 2021eko udan osasun-zentroak alde bakarrez ixteagatik.

SATSE Euskadiren ustez, “berriz ere agerian geratzen da zein den Osakidetza zuzentzen duten pertsonen jarrera antidemokratikoa”, eta, beraz, erabateko aldaketa eskatu du.