Abenduaren 17an Biarritzeko Atabal aretoak Muguruzaren nazioarteko biraren lehen kontzertua hartuko du. Iñigo Muguruza anaiak 60 urte beteko lituzkeen egunean izango da emanaldia. Ostegun honetan bost urte bete dira musikaria hil zenetik eta anaiari omenaldia egin nahi dio horrela. Kontzertua iragarri eta ordubetean amaitu dira sarrerak. 700 inguru, guztira. Abenduaren 20an Bilboko Miribillan 16.000 lagunen aurrean joko du Muguruzak.

Amerika, Asia eta Europako hainbat hirik hartuko dute bira hau, horien artean Dublin eta Merida. Dublinekoa apirilaren 25ean, Button Factory aretoan izango da. Meridakoa, berriz, maiatzaren 10ean, Ifeme aretoan. Kortatu zein Negu Gorriak taldeetan elkarrekin aritu ziren Muguruza anaiak.