'Izpiz izpi' lelopean urriaren 6an Kilometroak jaia ospatuko dute Azpeitian. Aurten Ikasberri ikastola arduratu da antolakuntzaz. Hiru ardatz dituzte oinarri: euskara, herrigintza, eta kulturartekotasuna eta aniztasuna. 1.000 boluntario arituko dira lanean, eta jaira gerturatzeko dei berezia egin diete aniztasun funtzionala dutenei. Haientzat ere egokitu dute jaia. Lau gune izango ditu jaiak, eta denetariko ekintzak eta ikuskizunak antolatu dituzte. Umeentzako jolasak, gazteentzako erronka probak, tailerrak, puzgarriak, eta beste hainbat jarduera. Gainera, Pirritx, Porrotx eta Marimotots pailazoak omenduko dituzte. Janari postuak egongo dira, eta ikastolako gimnasioan jaten emango diete 600 laguni.