Limako bere etxean hil da 86 urterekin, "urte luzez minbiziaren aurka borroka egin ondoren". Keiko Fujimori alabak eman du haren heriotzaren berri, X sare sozialean. Peruko Gobernuak hiru eguneko dolu nazionala agindu du.

Fujimorik 2000. urtera arte eutsi zion botereari, milaka hildako eraginez. Hamalau urte preso egon ostean atera zen espetxetik, duela bederatzi hilabete. Gaixo zegoen eta “indultu humanitarioa” eman zioten. Kritika asko piztu zituen erabaki horrek, izan ere, Fujimorik errepresio gogorra ezarri zuen gobernuan izan zen garaian.