Gizon bat atxilotu dute AEBko zerbitzu sekretuek, Trumpen golf zelaian AK-47 errifle batekin haren kontra tiro egiteko asmoa zuelakoan. Dena dela, ez da tiroketarik izan, eta presidente ohia onik dago, berak iragarri duenez. FBIk baieztatu duenez, Trump International Golf Clubean (West Palm Beach, Florida) gertatutakoa "hilketa saiakera" gisa ikertzen ari dira. 
Gizon errifleduna golf zelaiko hesitik gertu atzeman zuten, presidenteordea zen lekutik 300-500 metrora, sasietan ezkutaturik. Zerbitzu sekretuek tiro egin zioten armadunari, eta hura ihes egiten saiatu zen furgoneta beltz batean; minutu batzuk geroago errepidean atxilotu zuten. Sasien artean AK-47 erriflea, bi motxila eta kamera bat aurkitu zituzten. AEBetako ezein segurtasun indarrek ez du atxilotuaren nortasuna adierazi; baina, herrialdeko hedabideek argitaratutakoaren arabera, Ryan Routh da, Hawaiiko 58 urteko gizon bat.