EH Bilduk bi pertsona proposatu zituen zuzendaritzarako: Pako Etxeberria auzi medikua eta Pilar Garaialde estatuaren biktima. Eusko Legebiltzarreko Justizia Batzordean EAJk eta PSE-EEk atzera bota dute Garaialde, euren lau hautagaien mesederako.

EH Bilduk esan du iruditzen zaiola memoria politikak norabide okerra hartzen ari direla, eta pentsatu egingo duela zuzendaritzan segitzea. “Pilar Garaialde Gogoratik kanpo uzteko EAJ-PSEren erabakia oso larria da, iraingarria Estatuaren biktima guztientzat”. Hala, EH Bilduk esan du birplanteatu egingo due Gogora-n duen presentzia.

Bozketaren ostean, pertsona hauek osatuko dute Gogora Institutuaren Zuzendaritza Kontseilua: Pako Etxeberria antropologo eta auzitegi-medikua (EH Bilduk proposatuta), Maria Jauregui, ETAk hildako Juan Maria Jauregui zenaren alaba (EAJk proposatuta), Eider Landaberea ikerlari eta historialaria (EAJk proposatuta), Josu Elespe, ETAk hildako Froilan Elespe zinegotzi sozialista zenaren semea (PSEk proposatuta) eta Jose Antonio Perez historialaria (PSEk proposatuta).