Jone Berriozabal izango da Arabako Buru Batzarraren hurrengo presidentea alderdiak larunbatean Gasteizen egingo duen lurralde batzarrean hautatua izateko beharrezko botoak lortu ondoren.
Tokiko zenbait batzarren ostean, Berriozabalek babes nahikoa izan du astelehen honetan herrialdeko batzokietan egin diren bozketetan, Gorka Urtaran Gasteizko alkate ohiaren gainetik, alegia. Gauzak horrela, larunbatetik aurrera Berriozabalek Jose Antonio Suso ordezkatuko du lurraldeko alderdiaren ordezkaritzan, postua lehendabiziz emakume batek betetzen duelarik. Berriozabalek Berdintasun, Euskara eta Gobernantzako ahaldun kargua utzi beharko du, Arabako Buru Batzarreko presidente postuarekin bateragarria ez delako. Gipuzkoan, Eneko Goia eta Imanol Lasa hautagaiek parte ez hartzea erabaki ondoren María Eugenia Arrizabalaga izango da lurraldeko hautagai bakarra. Bizkaian berriz, David Salinas-Armendariz eta Iñigo Ansola hautagaiek lehian jarraitzen dute, alderdiak Salinas-Armendarizi hauteskunde-kanpainan bere webgunea eta sare sozialak erabiltzea debekatu ostean.