Nahikari Garcia Errealeko jokalaria elkarrizketatu dugu Hamaika Telebistan. Dioenez, Natalia Arroyo entrenatzaileak "freskotasuna" ekarri dio taldeari, eta "hazten" jarraitu nahi dutela gaineratu du. Genero arrakalaz galdetuta, orain arte "asko" borrokatu dutela esan digu, baina nabarmendu du borrokan jarraitu behar dutela, oraindik ere asko lor dezaketelako. Era berean, adierazi du berdintasuna ez dela emakumezkoen kontua bakarrik, eta gizonekin batera egin behar dela lan.
Izaskun Landaida Emakundeko zuzendaria elkarrizketatu dugu Hamaika Telebistan. Emakundek zaintza lanak erdigunean jartzeko beharra aldarrikatu dute martxoak 8 honetan: "Gizarteak ezin du onartu emakumeek bere gain hartzea zaintza lanaren ardura, honek eragin zuzena duelako emakumeen bizi baldintzetan" adierazi du Landaidak. Zentzu horretan, azpimarratu du zaintza lanak banatu behar direla emakumeen eta gizonen artean, eta baita instituzioen eta gizarte osoaren artean ere.
Josebe Iturrioz aktibista transfeminista elkarrizketatu dugu Hamaika Telebistan. Madrilgo Gobernuaren Trans Lege proiektuaren ondotik sortu den eztabaidaz dio feminismoaren "haustura itzela" sortzen ari dela, eta "urte askotarako min handia" eragingo duela lege horren kritiken atzean dagoen transfobiak. Transgenero eta transexual izateak "indarkeria asko" bizitzea dakarrela gaineratu du, eta diskurtso transfoboek areagotu egiten dutela.
