Elkarrizketa

All Stories

Arrate Illaro: 'Euskaraldian baieztatu dugu euskararen transmisioa emakumeen esku dagoela'

Arrate Illaro Euskaraldiko koordinatzailea izan dugu Hamaika Telebistan.

Euskaraldiaren bigarren edizioaren gaineko ikerketa aurkeztu berri dute, eta azaldu duenez, Euskaraldiak hizkuntza ohiturak aldatzeko proposamen praktiko bat dakar; eta ahobizi eta belarriprest moduan parte hartzen dutenek eta ariguneak sortzen dituzten entitateek urrats berriak ematea lortzen dutela.

Lehen eta bigarren Euskaralditik aldaketak nabariak izan direla adierazi du, izan ere, pandemiak baldintzatuta izan zen bigarren edizioa. Hala ere, gizarteak erantzun ona izan zuela azpimarratu du, eta ikusten dela interes eta ilusioa badagoela, “halako egoera zail batean, gizarteak erantzun zuen; horrek, lanean jarraitzeko indarrak ematen dizkigu”.

Aurtengo edizioa azaroaren 18tik abenduaren 2ra ospatuko da. “Berriz kaleak berreskuratu” nahi dituztela azpimarratu du Arratek. Hirugarren ediziorako egoera normalizatuago batean egotea eta ”lehenengo edizioko txinparta berriz kalera ateratzea” espero dute. Bestalde, azpimarratu du oraindik ere jende gehiago dagoela hizkuntza gaitasunaren arabera aukeratzen duena rola, eta ez hizkuntza jokabide edo portaeraren arabera.

Horrez gain, aurtengo helburu nagusiena, ahobizi eta belarriprest bezala parte hartzen duten herritarrak euskaraz bizitzeko bide horretan urrats berriak ematea da; "orain arte egon diren lorpenak bistaratzea eta herritarrek aldez aurretik euren lehentasunak erabakitzea nahiko genuke" azaldu du.

Gorka Urtaran: 'Hiriko mugikortasuna jasangarria izan behar da ahalik eta gehien'

Gorka Urtaran Gasteizko alkatea elkarrizketatu dugu Hamaika Telebistan. Gaurtik aurrera, martxan da Gasteizen autobus elektriko adimenduna. Neutraltasun klimatikoa lortzeko, hiriek duten paper garrantzitsua azpimarratu du Urtaranek: "Gasteizen apustu sendoa egiten ari gara neutraltasun klimatikoaren alde, horretarako, hiriko mugikortasuna jasangarria izan behar da ahalik eta gehien". Gaurtik, Gasteizen 6 autobus dira guztiz elektrikoak direnak, eta adierazi duenez, hemendik gutxira, 12 izango dira.

Arkaitz Rodriguez: 'Bada garaia torturan oinarritutako auzi guztiak bertan behera uzteko'

Arkaitz Rodriguez Sortuko idazkari nagusia izan dugu Hamaika Telebistan.

Audientzia Nazionalak Iratxe Sorzabali ezarritako espetxe zigorraren inguruan galdetuta, eskandalagarritzat jo du "torturatua izan den pertsona bat espetxera bidaltzea, 24 urterako" azpimarratu du. Gaieneratu du "zoritxarrez", Audientzia Nazionalarengandik halako ebazpenak jasotzera "ohituta gaudela". Horrez gain, jarrera horren aurrean, herri honetako arduradun instituzional eta bozeramaile politikoen aldetik "bestelako jarrera bat" espero dutela adierazi du; "Bada garaia errealitatea eta egia onartu eta torturan oinarritutako auzi juridiko guztiak bertan behera uzteko".

Bestalde, Eusko Legebiltzarrak gehiengo zabalaz gaitzetsi egin ditu polizia abusuen legea indargabetzeko saiakerak; horren harira, Rodriguezek dio "pozez" hartu dutela "behingoagatik, horrelako maniobra fraudulentu eta miserable" baten aurrean biktimak "babestu izana".

Ertzaintzako sindikatuek Sorturi leporatu ondoren poliziaren aurkako "gorroto diskurtsoa" izatea, Rodriguezek esandakoak berretsi ditu eta Ertzaintzaren "jarrera korporatibista" salatu du. Polizia eredu berri baten alde egin du, "jokaera demokratikoak dituena, euskalduna eta komunitatearekiko zerbitzura" egongo dena.

Memoria eraikitzeko Gogora Institutuak iragarritako azken ekimenari buruz, Sortuko idazkari nagusiak adierazi du Gogora Institutuaren eta Eusko Jaurlaritzaren ekimenekin esperientzia ez dela "ona", baina espero duela ekimen hau bideratua egotea "herri honetan izan diren biolentzia guztien aitortzaren bidean", eta ez dadin bilakatu, "beste kasu batzuetan bezala, errelato konkretu bat ezartzeko".

Sorturen hirugarren kongresuaren ondoren, "boterea esparru guztietan lehiatzeko" bokazioa dutela azpimarratu du. Kalean zein instituzioetan "ahalik eta botere gehien metatu" eta "euskal errepublika independiente, sozialista eta feminista" eraikitzeko. Bide horretarako estrategia laburbiltzeko, "sozialismoa ala basakeria", Rosa Luxemburgoren esaldia baliatu du. Izan ere, "ezinbestekoa" iruditzen zaio "zibilizazio berri bat" eraikitzea, "bizitza eta haren zaintza erdigunean jarriko dituena".

"Bidegurutze historiko" batean gaudela azaldu du, eta bide horretan "indar eraldatzaileok egiten dugunaren araberakoa" izango dela etorkizuna. Amaiurreko guduaz 500 urte igaro diren honetan, herri hau "zutik eta bizirik" dirauela azpimarratu du eta "determinatuta" jarraitzen duela "Estatu propio bat erdiesteko, burujabe izateko".

Juan Mari Aburto: 'Ezin ditugu baztertu gure nagusiak; Udal arreta hobetuko da'

Juan Mari Aburto Bilboko Udaleko alkatea elkarrizketatu dugu Hamaika Telebistan. Garraioarekin lotutako hainbat berri izan dira azken egunotan; alde batetik AHTren sarbideak Bilbon eta Gasteizen egiteko protokoloak sinatu dira, Bilboko Metroko 5. linearen lanen hasiera iragarri dute. Bilboko alkateak argi utzi ditu zeintzuk diren Bizkaiko hiriburuko lehentasunak epe ertainean; Tranbiaren amaiera egitea, Bilboko AHTren geltokia nola izango den jakin ondoren argituko luketena, Bilbobus, eta Metroko 4. linea, "horiexek dira erronkak".

hamaika telebista

11 laguntzaile

Image