Image

Gure begiz

All Stories

Agurne Gaubeka, Behatokia: "Herritarren eskubideak gutxiago edo gehiago bermatzen dira bizi diren eremuaren arabera”

Agurne Gaubeka Behatokiko zuzendariarekin hitz egin dugu Nafarroako Parlamentuak Mañeru eremu mistora pasatzeko eskaera ukatu ondoren. Gaubekaren esanetan, Nafarroako herritarrek “zatituta” jarraitzen dute, eta herritarren eskubideak “gutxiago edo gehiago bermatzen dira bizi diren eremuaren arabera”. Era berean, gehitu du euskararen aldeko pausoak ematen diren bakoitzean, “oztopoak” azaleratzen direla.
Egoera larritzat jo du Gaubekak: “Benetan larria da egoera norbaiti iruditzen bazaio eremu mistora pasatzeak bakarrik gaztelaniaz bizi direnen eskubideak murriztuko dituela, eta larria da Gobernuko alderdi batzuen jarrera”. Horren aurrean, herritarrek presioa egiten jarraitzea ezinbestekotzat jo du, eta baita Nafarroa osoan zonifikazioaren legea bertan behera uztea ere.

Maite Ubiria, kazetaria: “Badirudi frantziar epaitegietan ere aldaketa politikoaren aro hori partekatua dela”

Maite Ubiria NAIZeko kazetariarekin erreparatu diogu Lapurdiko, Nafarroa Beherako eta Zuberoako gaurkotasun politikoari. ‘Bakegileen’ aurkako bigarren epaiketa izan zen otsailaren 2an, eta Ubiriak azpimarratu du auziak aukera eman diela bakegileei eta ekintzaileei azaltzeko zeintzuk izan ziren ekimen horren arrazoiak, eta zergatik jotzen dituzten ekintza horiek legitimo eta baleko.

Epailearen erabakiaren zain daude bakegileak, eta Ubiriak “inpresioa” du bakegileak kondenatzen badituzte ere, kondena “aski sinbolikoa” jasoko dutela: “Horrek erakusten du bakegileek egindako lanak lortutako aitorpen eta onarpen maila, eta auzitegietan ere gero eta zailtasun handiagoa dagoela zigor handiak edo kondena irmoak emateko”. Horrez gain, nabarmendu du badirudiela frantziar epaitegietan ere “aldaketa politikoaren aro hori partekatua” izan dela, eta horren araberako erabakiak hartzen direla gaur egun.

Iñigo Aduriz, kazetaria: "ERCk ahalbidetuko du Mozal Legearen erreforma"

Iñigo Aduriz El Diario.es hedabideko kazetariarekin aztertu dugu Madrilgo egoera politikoa. Mozal Legearen erreformari heldu diogu, eta nabarmendu du ERCk ahalbidetu egingo duela erreforma hori. Adurizek azaldu du ponentziak onartu duela lortutako akordio horren testuak aurrera egitea, eta PSOEk eta Elkarrekin Podemosek aurrera jarraitu ahalko dutela ERCren abstentzioarekin, nahiz eta EH Bilduk aurka bozkatu.

Niko Cuenca, ekonomialaria: "Kezkagarriena azpiko inflazioaren igoera da"

Inflazioak %5,8ra egin du gora urtarrilean. Espainiako Estatistika Institutuak (INE) KPIaren datu aurreratua ematen du hilabete bakoitzaren amaieran, eta, azken hilabeteetako jaitsieraren ostean, gora egin dute berriro prezioek.
Niko Cuenca ekonomialariak nabarmendu du behin behineko datuak direla, eta hemendik bi astetara jakingo direla behin betikoak. Aipatu du INEk argindarraren eta gasaren merkatuko prezio librea erabiltzea erabaki duela lehen aldiz inflazioa neurtzeko, eta ikusi egin behar dela horrek zein eragin duen. Era berean, gehitu du erregaiak hobaritzeko sistema ere ez dela indarrean egon, eta hori ere antzeman egin dela. Horrez gain, azpimarratu du beherapenen efektuak ere eragina izan duela inflazioan: “Aurten aurreko urteetan baino beherapen txikiagoak egon direnez, inflazioak pixka bat egin du gora, eta esanguratsuena da inflazio orokorraren eta azpiko inflazioaren (azpiko inflazioa da energiaren eta produktu freskoen prezioak alde batera uzten dituena) arteko arrakala gero eta handiagoa dela da. Azpiko inflazioa %7,5era igo da, eta hori antzeman egiten da elikagaien saskian”. Cuencaren iritziz, horren zergatia izan daiteke BEZaren jaitsiera ez hainbeste igarri izana, enpresa askok aprobetxatu dutelako urte bukaera prezioak “eguneratzeko”, eta posible delako denda askok BEZaren jaitsiera hori prezioen eguneratzearekin “konpentsatu” izana.
Hori horrela, azpimarratu du, inflazio orokorra “mantendu” egin dela, baina kezkagarriena azpiko inflazioaren igoera dela.

Asier Blas, politologoa: "Ukrainako gerra tarteko gerra bat da AEBren eta Txinaren artean nazioarteko hegemonia lortzeko"

Ukrainako errusiar inbasioa hasi zenetik ia urte betera, Asier Blas EHUko zientzia politikoko irakaslearekin bat egin dugu; berarekin aztertu dugu nola aldatzen ari diren munduko ardatzak eta nolakoa izaten ari den gerraren bilakaera.
Alde batetik, ; Ukrainari emandako laguntza militarra beste fase batera eraman nahi duela NATOk, Alemania aurka agertu bada ere tanke jakin batzuk bidaltzearekin. Honek, adituak dioenez, dagoeneko goraka doan tentsioa gorago joatea ekarriko luke horrek.
Bestalde, munduko petrolio-industriaren desdolarizazioaz aritu gara, dagoeneko gertatzen ari dena. Txinako presidenteak abenduan Arabia Saudiko buruzagi nagusiekin izandako bilera gakoa izan zen petroyuanaren bultzada emateko…eta hasiera besterik ez dela azaldu du Blasek.

Ane Irazabal, kazetaria: "Alemaniak ez du talka zuzen bat bultzatu nahi Errusiarekin"

Alemaniak ez du NATOko kide askok eskatzen dioten pausorik eman nahi, izan ere, Mendebaldeak Ukrainako gerran gero eta parte-hartze zuzenagoa izatea ekarriko lukeelako. Ane Irazabal kazetariak azaldu digu horrek ekarriko lukeena eta baita ere aztertu dugu Alemaniak Errusiarekiko duen energia menpekotasunak zer-nolako ondorioak ekarriko dituen; besteak beste, ikatzaren ustiaketa areagotzea eta Lutheratzen gertatutakoa errepikatzea beste herri batzuetan ere.
hamaika telebista

11 laguntzaile

Image