Garces de los Fallos ikastolak Nafarroa Oinez jaia antolatu du aurten laugarrenez, eta eta Paula Agirre ikastolako zuzendariak azaldu digu norbanako bakoitzari esker egin ahal izan dutena. Komunitatearen garrantzia nabarmendu digu Paulak, eta herriari egindako ekarpenaz ere aritu gara berarekin.

Perkusio irakaslea dugu Xabi Olkoz. Tafallako musika eskola eraikin berezi horretan egotearen azalpena emateaz gain, herriko egun esanguratsuenak ezagutu ditugu berarekin: abuztuko jaiak, San Sebastian eguna, otsaileko eta urriko feriak, besteak beste. Bestalde, Xabik bere azken proiektuaren berri ere eman digu.

Tafallako alde zaharra bisitatu dugu Pedro Leraltarekin batera: garai bateko udaletxea, kartzela edota bertako etxeak. Pedro Mariscalen historia eta bere omenezko ekitaldiaren berri ere eman digu.

Ionmy ere Javi bere anaia buru den Cantamañanas egitasmoko kidea da. 2004. urtean hasita, 50 horma iruditik gora egin dituzte Uharten. Nazioarteko artistak biltzen dituen jaialdia da, eta Ionmyk esan digunez, bizilagunek oso ongi hartu dute egitasmoa, eta beren paretak ere eskaini dituzte margotu ditzaten.

Aritz Ardanbera fanfarreari lotuta hazi izan da; zortzi urte inguru zituela sortu zuten bere gurasoek eta beraien lagun batzuk eta 13 urterekin hasi zen beraiekin jotzen. Ibilbide luze honetan kontinente guztietan aritzeko aukera izan du,eta Nafarroako ordezkari ofiziala ere izan da hainbat ekimen garrantzitsutan.

Ana Labianok Uharteko baratzeei buruzko kontu ezberdinak azaldu dizkigu: "cebolleros” goitizenaren jatorria, tipula txapelketaren kontuak edota orain dela 60 urte emakumeek Iruñeko azokara egiten zuten bidaia. Dena den, gaur egungo baratzak aisiari lotuta ere badaudela azaldu digu Labianok, eta pandemia garaian oso garrantzitsuak izan zirela azpimarratu du.

Vanesaren bidez ezagutu ditugu Uharteko inauteriak. Azaldu digunez, 2001. urtean, Berdintasuna Elkarteak, beste hainbat elkarterekin batera, hainbat pertsonaia sortu zituen inauteriei bultzada emateko. Vanesak aurkeztu dizkigu pertsonaia horiek, eta baita horien egitekoa ere. Pertsonaiez gain, Amaiur dantza taldeak hainbat dantza sortu zituen, eta horiek ere dantzatu dizkigu Vanesak. 

Esti Iribarrenek Eugiko urtegiaren historiaren berri eman digu, eta 'Bastardix' bere musika taldea ere ezagutu dugu. Iribarrenek kontatu digunez, Francoren garaian egin zuten urtegia, eta ondorioz, leku horretan bizi ziren herritar batzuk Iruñera joan ziren bizitzera, eta beste batzuk gaur egungo Eugin eraiki behar izan zituzten etxeak.