Ainhoa Tirapu, ELA: “39 egun beteko ditugu greban, eta patronala ez da mugitzen”
Bizkaiko adinekoen egoitzetako langileak beste 10 greba egun egiten ari dira ELA sindikatuak deituta. Ainhoa Tirapu sindikatuko kideak azaldu du 29 greba egun egin dituztela dagoeneko, eta 10 egun hauekin 39 izango direla guztira. Hala ere, salatu du patronala ez dela “mugitu”.
Tirapuk azaldu du manifestazioa egin zutela atzo, eta lanaldietan jarri zutela fokua, langile askok ez dutelako lanaldi osoa, eta horrek prekarietatea areagotzen duelako. Zentzu horretan, Tirapuk salatu du “zoritxarrez” langileak “ohituta” daudela mobilizazio luzeak egin behar izateaz, eta “indarrarekin” eta “gogotsu” daudela mobilizazioekin jarraitzeko: “Badirudi egun gehiago behar direla patronalak aldarriak entzun ditzan”.
