Amaiurko gazteluko gudaren bosgarren mendeurrenaren harira, Amaiurko abesbatza izango da aurtengo Aberri Eguneko ereserkietako bat interpretatuko duena. Asteburu honetan aritu dira grabazio lanetan Batera ekimenak babestuta.

Egiarako Eskubidearen Nazioarteko Egunari lotuta, Estatuaren bortxa pairatu duten biktimak aitortu gabe daudela gogorarazi du Egiari Zor Fundazioak.

Egiari Zor fundazioko kidea den Ixone Fernandezek azaldu duenez, giza eskubideen urraketa jasan zuten pertsona batzuk aitortuak izan dira eta legeak ematen dizkien eskubideak erabili ahal izan dituzte. Hala ere, Estatuak eragindako bortxa pairatu duten gehienen abiapuntua oso bestelakoa dela azaldu du; "urte askotako ukapenaren ondoren, egin zigutenaren egia ezartzeko borrokan jarraitzen dugu, heriotza eta giza eskubideen urraketa bakoitza, salbuespenik gabe, ofizialki erroldatu, aitortu eta erreparatu dadin". Halaber, kasu gehienetan "gertatutakoaren egia itzalez eta argitu gabeko galderez inguratuta" dagoela gogoratu du Egiari Zor fundazioak. Horrez gain, Estatuak eragindako giza eskubideen urraketa eta heriotza askoren inguruan egia ezartzeko lanean jarraitzen dutela azpimarratu dute. Egia eskubide bat den aldetik, 'Egia jakiteko garaia da' ekimena jarri du martxan. Hemen prentsaurrekoaren zati bat.

1984ko martxoaren 22an espainiar Poliziak Pedro Mari Isart, Rafael Delas, Jose Mari Izura eta Dioni Aizpuru hil zituen Pasaiako badian. Hilketak ikusi zituzten lekukoak eta beste hamaika proba dauden arren, oraindik ez da kasuaren egia, justizia eta aitortza ofizialik izan. Senide eta lagunek kasua argitzeko lanean jarraitzen dute.

Eusko Legebiltzarrak Gazteriaren Legea onartu du ostegun honetan, EAJren, PSEE eta Elkarrekin Podemosen babesarekin. Lege horrek legezko maila ematen dio emantzipatzeko eskubideari, eta Arabako, Bizkaiko eta Gipuzkoako gazteen eskubideak erdigunean jarriko ditu. Helburu nagusia gazteen emantzipazioaren batez besteko adina 30 urtetik 28 urtera murriztea da.

Eudelek deituta, elkarretaratzeak egin dituzte hainbat udaletxe atarian. Bost minutuko elkarretaratze isilak eginez, Hego Euskal Herriko dozenaka udalek elkartasuna adierazi diote Ukraniari.

Martxoaren 3a egun adierazgarria da Gasteizen, izan ere, 1976ko martxoaren 03an, greba orokor batean Espainiako Poliziak bost langile hil eta ehunka zauritu zituen tiroz. Urtero bezala, egun horretako sarraskia gogoratu dute. Goizean, Martxoak 3ko plazako monolitoaren inguruan bildu dira alderdi, instituzio eta sindikatuak 1976ko sarraskiko biktimak omentzeko. Arratsaldean, sindikatuen omenaldiaren ostean, ohi bezala, manifestazio jendetsua abiatu da, euripean, Foru plazaraino.

Espainiako Kongresuan hainbat lege eta erreforma zuzemenen egoera aztertzeko, hala nola, Mozal Legea, Memoria Historikoaren Legea edota Pentsioen Erreforma, agerraldia egin du EH Bilduk. Eta koalizioak nabarmendu du jarrera eraikitzailea izango duela, baina euskal herritarren eskubideak eta ongizatea babestuz.

Ehunka lagun hurbildu dira Ataungo San Gregorio auzoko pilotalekura Karmele Aierberi azken agurra emateko. “Eskerrik asko herriari emandakoagatik”, herriari emandakoa itzuli dio herriak Aierberi. Bere leialtasuna, eskuzabaltasuna konpromisoa eta euskararen alde egindako lan guztia eskertu eta ibilbide politikoan emandako urratsak ekarri diztute gogora. Omenaldian hitza hartu dute besteak beste, Joseba Alvarez, Martin Aramendi, Arnaldo Otegi edota Juan Karlos Ioldi.