Ukrainako gerrak urte bete duen egunean, 'Gerrari ez' plataformaren aurkezpena egin dute. Plataformak Errusiaren erasoa eta NATOren politika espantsionista gaitzetsi du, eta Europako gobernuen militarismoaren hazkundea salatu du. 'Gerrari ez' plataformak Ukrainara armak bidaltzeari uko egin dio. Gainera, Madrilgo Gobernuari eskatu dio ahalegin guztiak egin ditzala berehalako su-etena lortzeko. Horrez gain, alde bateko zein besteko errefuxiatu eta desertoreei elkartasuna adierazi die.

2022ko otsailaren 24an Errusiaren inbasioa hasi zen Donetsk eskualdean. Ukrainako Armadak azken hilabeteetan etsaiaren erasoei aurre egitea eta herrialdearen ekialdeko eta hegoaldeko hainbat eskualdetan lurraldeak berreskuratzea lortu dute.
Gatazka hasi zenetik 8.000 zibil baino gehiago hil dituzte Ukrainan, Giza Eskubideetarako NBEren Bulegoaren arabera. Ukrainako gerra hasi eta urtebetera, Gasteizen, erakundeak bildu dira elkarretaratze batean.Urteurren honetan manifestazioa antolatu dute Gasteizen, Bilbao plazatik Andre Mari Zuriaren plazara.

Jean Noel Etxeberri 'Txetx' eta Beatrice Molle, Luhuso ekimenarengatik auzipetuak izan diren bi bakegile, Parisko Auzitegi Korrekzionalean epaituak izan daitezen galdegin du terrorismoaren aurkako Frantziako fiskaltzak. 2016ko abenduaren 16an eginiko polizia operazio batean atxilotu zituzten Luhusokoak, ETAren armategiaren %15 indargabetzera zihoazela.

Francori seme kutun izendapena kentzeko erabakia hartu du Gipuzkoako Foru Aldundiak, eta horri buruz hitz egin dugu Esti Elduaien EH Bilduko batzarkidearekin. Elduaienek “txalotu” egin du erabakia, baina “lehenago” egin behar zela dio. Hala ere, nabarmendu du prozesu horiek uste baino “zailagoak” direla, “ezjakintasun handia” dagoelako.
Elduaienek azaldu du Espainian onartutako Trantsizio Demokratikoaren Legearen harira etorri dela erabakia: “Lege horrek jasotzen duenaren arabera, gisa honetako errekonozimendu guztiak bertan behera utzi behar dira, baina konturatu gara instituzio askok ez dakiela zein errekonozimendu dituen ere; informazio hori guztia artxiboan dago”.
Hori horrela, EH Bilduko batzarkideak azaldu du Lege horri tiraka Foru Aldundiari eskatu zitzaiola gisa honetako errekonozimenduak kentzeko, baina ez zuela horri buruzko informaziorik. Orduan, historiagile bati agindu zion ikerketa lana, eta horren bidez ezagutu dituzte Francoren zein diktadura defendatu zuten beste hainbat pertsonaren errekonozimendu eta dominak: “Trantsizioaren eta Frankismo garaiaren ezkutatze eta ezikusia egitearen ondoriozko informazio gabezia baten ondorio ere izan da erabakia hain berandu etorri izana”.

Etxeratek jakitera eman duenez, Anartz Aranbarri eta Luis Roncero iheslari ohiak Euskal Herrira itzuli dira. Orotara, egun, hemezortzi erbesteratu eta bost deportatu daude Euskal Herrira itzuli gabe. Bestalde, azkenaldian hirugarren graduen kontrako helegite ugari izaten dira Auzitegi Nazional espainolean. Berriki Ainhoa Barbarini, Asier Karrerarieta Asier Rodriguezi indargabetu diete hirugarren gradua.

“Kereila Argentinarra Babesteko Estatuko Koordinakundeak” (CEAQUA) frankismo garaiko Estatuko segurtasun indar eta kidegoetako agenteen aurka aurkeztutako lau kereilaren berri eman du Madrilen CCOO sindikatua eta Amnesty Internationalen eskutik. Kereila horien artean Maria Concepcion Edo Gilena dago, Iruñeko epaitegietan aurkeztutakoa. Torturak eta tratu iraingarria jasan zituen 1973ko ekainean, 19 urterekin, Telefonicaren eraikinetik sindikatu baten eskuorriak jaurti ondoren.

Martxoak 3 elkarteak behin betiko onespena eman dio erakundeen proposamenari. Beraz, 2021eko hitzarmena errespetatuko dute, fundazioaren estatutuen helburuak zuzenduko dituzte, eta biktima bat egongo da lehendakariordetza postuan. Bestalde, biktimen elkarteak adierazi duenez, ez du nahi Espainiako Gobernuaren presentzia fundazio honetan.

Franco 1939ko ekainaren 1ean izendatu zuten Gipuzkoako seme kutun, eta 1945eko ekainaren 23an foru aldundiko ohorezko presidente. 1939. eta 1975. urteen artean emandako beste titulu batzuk ere kendu dituzte.