EAJk, PSE-EEk eta Elkarrekin Podemosek aldeko botoa eman dute; kontrako botoa eman dute PPk eta Voxek, eta “abstentzio kritikoa” hautatu dute EH Bilduko legebiltzarkideek.

EAJ aurreko legealdian aldatzen saiatu zen, baina gehiengorik ez zutenez lortu Eusko Legebiltzarrean, atzera bota behar izan zuten. DBSE berritua apirilean jarriko da indarrean. Gaur egun prestazioa 727 eurokoa da, datorren urtean ezin izango da 803 eurotik beherakoa izan.

Aldaketa nagusia da adina 23 urtetik 18ra igaroko dela, eta nahikoa izango da Lanbiden urtebetez izena emanda egotea. Dirulaguntza kobratzeko hiru urteko errolda beharrezkoa izango da aurrerantzean ere, nahiz eta baldintzak malguagoak izango diren kolektibo zaurgarrienentzat.

Olentzero iritsi aurreko egun esanguratsuetan, abenduaren 22an eta 23an, grebara deituta daude Amazonen Trapagarango (Bizkaia) langileak. Enpresa behartu nahi dute lan baldintzak hobetzeko negoziaziora, eta xede horrekin eskatu dute zentrorako hitzarmen propioa ere. Gotzon Mardarats Amazoneko langileak eman digu grebaren eta aldarrikapenen berri; eta Gabonen atarian mezu bat bidali nahi izan du: kontsumo eredua birplanteatzearen beharra.

Bizkaiko metalgintzako 'korapiloak askatu gabe' jarraitzen du; hala ere, beste aukera bat dute sindikatuek eta patronalak lan hitzarmenaren negoziazioan. Abenduaren 14an bildu ziren azkenekoz, baina, patronalak ez zuen proposamen berririk aurkeztu. Bien bitartean, gehiengo sindikalak aurreko bileran konpromisoa hartu zuen beste eskaintza bat aurkezteko.

Siemens Energyk Gamesaren % 93 kontrolatzen du dagoeneko, EEPk % 77,88ko onarpena lortu ondoren, eta burtsatik ateratzeko prestatzen ari da. Bien bitartean, Siemens Energyk Siemens Gamesa osoa erosteko egindako eskaintza publikoa auzitara eramango du akziodun minoritario batek, uste duelako Alemaniako taldeak akzioa erosteko eskainitako prezioa ez dela bidezkoa.

Bada, Gamesaren akzioak erosteko eskaintza publikoaren barruan, Siemens Energy Group taldeak iragarri zuen kaleratze gehiago egitea aztertuko duela. Eta testuinguru horretan, gaurkoan protesta egin dute ELA, CCOO eta UGT sindikatuek deituta, Sarrieguren plataren atarian. Izan ere, etorkizuna etengabe mehatxatuta ikustearekin gogaituta daude langileak, hala, egonkortasuna eskatzen dute beharginek.

Espainiako Lan Ministerioaren buruak, Yolanda Diazek, 2023an gutxieneko soldata igotzeko proposamenak plazaratu ditu, aditu talde baten laguntzaz. % 4,6 eta % 8,2 bitarteko igoera proposatu du 2023rako. Horrek esan nahi du 1.082 euroraino igoko luketela soldata gordina, urtean 14 ordainsari izanda.

Hala ere, Espainiako Gobernuaren barruan badira desadostasunak. Lan Ministerioak pentsioen igoerarekin parekatu nahi zuen gutxieneko soldataren igoera, %8,5. Bestalde, sindikatuek %10eko igoera eskatu dute, 1.100 euroraino. CEOE Espainiako Enpresaburu Elkarteen Konfederazioak, berriz, igoera “moderatua” izatea espero du.