Skip to main content

Gurean Gaur

Mertxe Mugikak AEK-ren koordinazioa utziko du

2019-07-08
Urriaren batetik aurrera, koordinazio burua Alizia Iribarren nafarrak hartuko du. Mugikak 13 urteko ibilbidea egin du AEK-n. Aurrerapausuak egon badirela aitortu badu ere, gehitu du, nahikoak ez direla izan. Botilaren metafora erabilita, hau betetzen jarraitu behar dela adierazi du, elkarlana ardatz izanda. Arazoen artean helduen euskalduntzea aipatzen du, eta, instituzioetan, euskararen erabilera transbersala faltan somatzen du. Hala ere, Korrika eta Euskaraldia bezalako ekimenen ekarpena balorean jarri du. Oro har, balorazio positiboa egin du Mertxek, eta euskalgintzaren bigarren plano batetik lan egingo du oraindik aurrera.
Foru Gobernua osatzeko aurreakordioa lortu dute PSN, Geroa Bai, Podemos eta I-Ek

2019-07-05
Arratsaldean berriz bildu dira alderdien ordezkariak, oraindik zehazteke dituzten puntuak ixteko. Eguerdian, Nafarroako Parlamentuan eskainitako agerraldian azaldu dutenez, ostegun gauean lortu zuten lau alderdiek gobernu aurreakordioa. Negoziaketa osatzen duten alor sektorialak aintzat hartzen dituen akordio programatikoa da lortu dutena. Hala ere, oraindik zehaztu beharreko hainbat puntu ditu aurreakordioak. Hor sartuko lirateke dokumentuaren behin betiko bertsioa idaztea, euskarara itzultzea, eta batez ere, alderdi bakoitzaren zuzendaritzek eta oinarriek akordioa hobestea.
Tubacex enpresako langilearen heriotza salatu dute Laudion

2019-07-05
Tubacex enpresan atzo izandako heriotza salatu dute goizean Laudion . Enpresako lan batzordeak deituta, lantegiaren aurrean egin dute elkarretaratzea eta manifestazioa egin dute ondoren herriko plazaraino. Langileek salatu dute prekarietatearen ondorioz hil dela gaztea, eta enpresako zuzendaritzari egotzi diote heriotzaren erantzukizuna. 25 urteko gaztea praktiketan ari zela hil zen Tubacex fabrikan. Ikasketa duala egiten ari zen, hau da, aldi berean uztartzen ari zen lana eta lanbide heziketa. Iturri sindikalaren arabera, bi urte zaraman enpresan mantentze lanetan eta lanean ari zela makina baten pieza bat erori zitzaion gainera. ELAk gogoratu du aurten dagoeneko 26 pertsona hil direla lanean Hego Euskal Herrian, horietatik hiru Araban. Bestalde, LABek salatu du beharginak ezin zuela bakarrik jardun ez zuelako behar beste esperientziarik postu horretan bakarrik lan egiteko, horregatik sindikatuak neurri eraginkorragoak eskatu ditu. Horrez gain, Ernaik ohar bidez salatu du prekarietatearen ondorioz heriotzek ez dutela etenik eskualdean. Gogora ekarri dute iaz Orozkon bi langile hil zirela eta beste behargin bat duela bi urte. Azpimarratu dute Tubacex enpresan 10 urtean lau langile hil direla dagoeneko.
Juan Sebastián Elcano omenduko dute asteburuan, euskal kostaldea zeharkatuko duen estropadan

2019-07-05
100 ontzitik gora izango dira partaideak, tartean Armadaren Juan Sebastian Elcano eskola ontzia, Lucretia ontzia edo Saltillo EHUko ingeniaritza ikasleen itsasontzia. Tradizionalki “Costa Vasca” deitu izan den estropadak, aurten Horizonte Elcano izena hartu du. Izan ere, 500 urte betetzen dira itsasgizon euskaldunak eta bere taldeak munduari bira eman ziotenetik. Bera omentzeko helburuarekin parte hartzaileak Getxo eta Hondarribiako portuetatik irtengo dira Getariara helduz.
Real Madrilek utzita, Martin Odegaard norvegiarrak Realean jokatuko du

2019-07-05
Azkeneko bi urteak Holandako ligan eman ditu, Heerenveen eta Vitesseren elastikoak defendatzen. Futbolari trebea da eta nerabe zela bere herriko selekzioarekin debuta egin eta Real Madrilekin fitxatu ostean, goi mailan leku bat egin ezinik aritu da. Orain, Vitessen errendimendu ona eskaini ostean, Realean jokatzeko aukera iritsi zaio. Norvegiarra Realaren bosgarren fitxaketa da, Alex Remiro, Sagnan, Portu eta Isaken atzetik
Gaur ireki dute eraso sexisten aurkako informazio puntua

2019-07-05
Gaur ireki dute eraso sexisten aurkako informazio puntua. Azken urteetan lez, Gaztelu plazan kokatu dute kioskoa. Aurtengo ordutegia zabaldu egin dute eta informazio bila hurbiltzen diren herritarrei banatutako gida zaharberritu dute egungo eraso sexisten aurkako legeari egokituta.
 
bannerra

bannerra