Image

Mundua

All Stories

Alemaniak eta AEBek ere tankeak bidaliko dituzte Ukrainara

Alemaniak Leopard 2 tankeak Ukrainara bidaliko dituela iragarri du eta AEBek Abrams tankeak. Errusiak AEBetan duen enbaxadore Anatoli Antonovek adierazi du AEBen "probokazio nabarmena" dela. Mendebaldearen plana porrotera bideratuta dagoela ziurtatu du Errusiak. Espainiak ere bat egingo du Ukrainara borroka-orgak bidaltzeko Europako planarekin.

EH Bildu eta ERC Ukrainara tankeak bidaltzearen aurka agertu dira, gatazka konpontzeko bide diplomatikoak eta elkarrizketa erabili behar direla uste dute. Elkarrekin Podemosek esan du "gerrako eskaladan soilik lagunduko lukeela. Bestalde, EAJ "guztiz bat dator" tankeak bidaltzearekin.

Bartzelonako epaile batek 45 polizia auzipetu ditu urriaren 1eko kargengatik

Urriaren 1eko polizia-kargek, guztira, mila zauritu utzi zituzten 2017an, autodeterminazio-erreferenduma eragozteko ahaleginean.

Epaileak ondorioztatzen du “lehenik eta behin negoziazioa eta aginpidea” erabili behar direla indarra erabili aurretik. Instrukzio-epailearen ustez, poliziek torturak eta osotasun moralaren aurkako delituak egin ahal izan zituzten.

Autoan, instrukzio-epaileak Espainiako Poliziako agente batzuen jarduera “neurriz kanpokoa” dela dio. Borra kolpeak ere deskribatzen ditu, ukabilkadak hautesleen buruan eta aurpegian, eta bozketa-zentroetan biltzen zen adineko jendearen aurkako erasoak.

Alemaniako Poliziak Greta Thunberg indarrez atera du herrixka bat eraistearen aurkako protesta batetik

Alemaniako Poliziak Greta Thunberg ekintzaile suediarra atera du Lützerath herriaren inguruan ingurumen-ekintzaileen taldeak blokeatzeko ekintza batetik. Thunberg Lützerathetik 9 bat kilometrora dagoen ikatz-meategi batean protestan ari zela atxilotu zuten. Bertan, manifestari talde batekin eseri zen meategitik gertu.

Espainiako Gobernuak errekerimendu ofiziala egin dio Gaztela eta Leongo Gobernuari abortuak saihesteko araurik ez onartzeko

Gaztela eta Leongo presidenteorde Juan Garcia-Gallardok, Voxekoak, iragarri zituen aldaketa horiek. Moncloak, haurdunaldia borondatez eteteko araudia zehatz-mehatz errespetatu ezean, tresna legal guztiak erabiliko dituela adierazi du.

Izan ere, aldaketa horien ondorioz, ginekologoek zuzenean osasun mentalera bideratuko lituzkete haurdunaldia eteteko asmoa duten emakume haurdunak, seigarren eta bederatzigarren asteen artean fetuaren taupadak entzuteko aukera egongo litzateke, eta haurdunaldiaren azken etapan egiten diren 4D ekografiak zerbitzu-zorroan sartuko lirateke.

Auzitegi Goreneko magistratuak sedizio delitua erretiratu dio Carles Puigdemonti

Sedizio delitua indargabetzen eta dirua bidegabe erabiltzeko delitua murrizten duen erreforma indarrean sartu ostean jakinarazi du Auzitegi Gorenak. Halaber, sedizio delituagatik Carles Puigdemont, Toni Comin eta Lluis Puig atxilotzeko indarrean zegoen euroagindua bertan behera utzi du. Halere, Pablo Llarenak Puigdemont funts publikoak bidegabe erabiltzeagatik eta desobedientziagatik auzipetzeko asmoa berretsi du.

Marta Rovira ERCko idazkari nagusiaren eta Clara Ponsati kontseilari ohiaren kasuan, berriz, desobedientzia delituagatik auzipetu ditu orain epaileak.

1.200 pertsona atxilotu dituzte gutxienez, 'kanpamentu bolsonarista' desegiteko operazioan

Brasilgo Auzitegi Gorenak Jair Bolsonaro presidente ohiaren ehunka jarraitzaileren kanpalekua husteko agindua eman dio herrialdeko Armadari astelehen honetan. Poliziak ordubeteko epea eman die manifestariei duela bi hilabete eratutako kanpamentutik erretiratzeko. CNN Brasilgo telebista kateak Poliziako iturriak aipatuz jakinarazi duenez, gutxienez 1.200 lagun atxilotu dituzte kanpamentua desegiteko operazioan.
hamaika telebista

11 laguntzaile

Image