Skip to main content
Gipuzkoako adinekoen egoitzetako hitzarmen duina eskatzeko mobilizatuko da LAB

2018-09-12

Azaroan urtea beteko da Gipuzkoako helduen egoitzetako lan hitzarmen berria negoziaziatzeko mahaiak azken bilera egin zuenetik, eta LAB sindikatuak salatu du ordutik ez dutela inolako harremanik izan.

Herrialdeko hitzarmenaren beharrean daudenak 5.000 langile inguru dira. Sindikatuak salatu duenez, 2012ko soldata taula eta lan baldintzekin jarraitzen dute, eta kasu batzutan lan baldintza okerragoak dituzte. Leire Ormazabalen hitzetan, gainera, hitzarmenik ezak eragin zuzena du egoiliarrek jasotzen duten zerbitzuaren kalitatean ere.

LABeko ordezkariak zehazu du sindikatuak egin dituela ahaleginak negoziazioa berreskuratzeko, baina ez dutela erantzunik jaso. Gipuzkoako zahar egoitza eta eguneko zentroetako zerbitzua izanik, egoeraren erantzule nagusia aldundia da Ormazabalen ustez, baina sektoreko patronalak ere utzikeriaz jokatzen ari dira. Hargatik, mobilizazio kanpainari ekin diote aldundi aurreko elkarretaratzearekin eta eskualdeetara hedatuko dute dinamika datozen hilabeteetan.

Diada: Milioi bat lagunek bat egin dute Kataluniako errepublika egikaritu eta preso zein erbesteratu politikoen itzulera eskatzeko

2018-09-11
Milioi bat lagunek ANC-ek egindako deialdiarekin bat egin dute Bartzelonako Diagonal zumarkalea betez. Aurtengo Diadak ezaugarritze berezia zuen azken 12 hilabeteetan gertatutakoen ondorioz. Horiek horrela, Hamaika Telebistan saio berezia osatu dugu, Beñat Zarrabeitiaren gidaritzapean, Iker Bizkarguenaga, Ion Ansa, Itsaso Guemes eta Laura Mintegiren parte hartzearekin.
Miloi bat lagunek errepublika aldarrikatu dute Diadan

2018-09-11
Zazpigarren urtez jarraian, sekulako jendetza atera da Kataluniako Diadan kalera, Bartzelonako Udaltzaingoaren arabera, milioi bat izan dira. 'Fem republica catalana' lelopean, azken hilabeteetako salbuespen testuingurua salatu eta independentziaren aldeko aldarrikapen ozena egin dute.
Aurrerapena: Joli Pascualena, umorea bidelagun

2018-09-16
Irailaren 16an, 21:00etan, Joli Pascualenarekin, bera berpizten duen baratxuri zopa prestatuko dugu. Bere ibilbidea, zailtasunak eta garaipenak komentatzen ditugun bitartean sorpresak ere jasoko ditu gure gonbidatuak.
Mikel Garciandia: "Fedea, berez, esperientzia bat da"

2018-09-10
Ajoarrieroa saioko atal honetan Uharte Arakilen dagoen Zamartze monastegian bizi den Mikel Garciandia apeza elkarrizketatu dugu. Fededun izatearen ikuspegia, arrazoiak, esperientziak, helburuak,...azaldu dizkigu; baita beren egunerokoak, afizioak ere.
Baldintza okerrenetan botoa eman ondoren, errepublika eraikitzeko gai direla sinetsita daude katalanak

2018-09-11

Zazpigarren urtez jarraian, sekulako jendetza atera da Kataluniako Diadan kalera, Bartzelonako Udaltzaingoaren arabera, milioi bat izan dira. 1714an Espainiako Erresumak Kataluniako Printzerriari lege eta erakunde propioak kendu zizkioneko data gogoan, 17:14an, olatu erraldoia egin dute Bartzelonako Diagonalean, eta independentzia oihuek hautsi dute isiltasuna.

ANCko presidente Elisenda Paluziek argi esan du orain artekoa egiteko gai izan badira, zazpi urtez kaleak betetzeko, ehunka hautetsontzi babesteko eta baldintza okerrenetan botoa emateko, gai izango direla Kataluniako errepublika eraikitzeko ere. Hain justu, horretarako modua bilatzeko eta helburu orokorrak lehenesteko eskatu dio Generalitateari.

Ezohiko Diada gisa izendatua izan da aurtengoa. Eta etengabe izan dituzte gogoan preso eta erbestean dauden politikariak, besteak beste, goizean Rafael Casanovari egindako lore eskaintzan. Han parte hartu dute zenbait euskal politikarik ere. Bertan zen, esaterako, Euskadi Buru Batzarreko presidente Andoni Ortuzar, PDeCATeko ordezkariekin. Ortuzarrek presoak eta erbesteratuak izan ditu gogoan, eta Kataluniako auzia konpontzeko aukera bakarra elkarrizketa izango dela ziurtatu du.

EH Bilduko legebiltzarkide Maddalen Iriartek, bere aldetik, aurtengo Diada salbuespenezkoa dela nabarmendu du, baita askatasuna aldarrikatzeko eguna ere, eta Kataluniako askatasunaz gain, Euskal Herriarena ere aldarrikatuko dutela.

Preso eta erbesteratuak gogoan, esan bezala. Hain justu, Lledonerseko espetxean egon da, astelehenez, Arnaldo Otegi EH Bilduko koordinatzailea, preso politiko katalanak bisitatzen. Irabazteko konbentzimenduz ikusi dituela adierazi du.

 
bannerra

bannerra