Asteburuko kirol albisteak izan ditugu hizpide Jon Hernandez kirol kazetariarekin. Bera Berak Erreginaren Kopa irabazi du; Alis Fernandez izan zen protagonista nagusia, eta 14 geldiketa egin zituen. Zazpi aldiz irabazi du iada; azken aldiz, 2019. urtean izan zen, eta datorren urtean ere titulua eskuratzeko parada bikaina izango du, azken fasea Donostian egingo delako.
Sestao River taldearentzat ere asteburu bikaina izan da, lehen federaziora heldu delako. Sestaokoek denboraldi bikaina egin dute, eta nahiz eta hiru jardunaldi falta liga amaitzeko, datorren urtean Espainiako Ligako 3. mailan jokatuko du. Gainerako gizonezkoen euskal taldeek ere garaipenak lortu dituzte, eta bereziki azpimarragarria da Eibar eta Alavesen egoera, ligako lehen bi postuetan daudelako.

‘Soilik baietz da baietz legea’ onartu dute gaur Espainiako Kongresuan, PSOEk eta PPk adostuta. Iñigo Aduriz Eldiario.es agerkariko kazetariarekin aztertu dugu gaia, eta nabarmendu du PPk “bere garaipena” balitz bezala ospatu duela erreformaren onarpena: “PPk txaloka hartu du legea aurrera atera izana, eta PSOEk, berriz, ez du txalotu. Argi gelditu da gobernuaren barruan dagoen arrakala sakona, eta horri erantzuten dio PSOEren jarrerak”.
Adurizek azaldu du Unidas Podemosen eta PSOEren arteko arrakala nagusia dela aurrera atera den erreforman biktimek berriro frogatu beharko dutela epaile baten aurrean indarkeria jasan duten edo ez abusu bat edo bortxaketa bat gertatzen denean. Bestalde, dio PSOEren helburu nagusietako bat dela hemendik aurrera epaileek aukera gutxiago, edo aukerarik ez izatea zigorrak leuntzeko: “Badirudi zigorren jaitsiera hori ezin dela saihestu nahiz eta erreforma hori aurrera atera, baina posible izango da ez izatea orain arte bezain zigor leunak”.

Asteburuko kirol albisteak aztertu ditugu Ane Urkiri kirol kazetariarekin. Hasteko, Zuazo eta Bera Beraren arteko partida izan du hizpide. Bera Berak irabazi zuen partida, eta nabarmendu du Zuazo taldearen egoera “zaila” dela: “Talde horren egoera ekonomikoak baldintzatu du denboraldia, jokalariak ere erreta daude, eta disfrutatzen saiatuko dira jaitsiera fasean”. Hain zuzen, gaur zozkatuko dute jaitsiera fase horretako egutegia.
Alaves eta Athleticen arteko partida ere izan du hizpide, eta Urkirik nabarmendu du oso egoera delikatuan iritsi zirela Alaves zein Athletic. Zuri gorriek lortu zuten garaipena, eta Urkirik nabarmendu du “oxigenoa” hartu dutela Iraia Iturregiren jokalariek, jaitsiera zazpi puntura dutelako orain. Kontrara, Alaveseko jokalariek bost puntura dute salbazioa, bost jardunaldien faltan: “Salbazioa lortzeko gauzak oso ongi egin beharko dituzte, eta arerioek oso gaizki”.

Hauteskunde aintzineko kanpainan Nafarroako eskuina inoiz baino zatituagoa dago. PPk eta UNPNk bide aski banatuak ari dira euren bidea egiten eta Martxelo Diaz kazetariak egin digu honen inguruko analisi politikoa.

Jose Mari Esparza idazlearen eskutik, Pedro Mariskala nor izan zen ezagutu dugu, Nafarroa Garaian izan zen "pertsonaia klabe" bat.

Nazioarteko kontuekin, Ekuadorko presidentea politikoki epaitzeko eskaria onartu du Konstituzionalak. Bi urte daramatza agintean Ekuadorko presidente Guillermo Lassok, eta beste bi geratzen zaizkio agintaldia amaitzeko. Baina, egoera asko aldatu ezean, ez dirudi legealdia osatzeko aukerarik izango duenik. Vero Satrustegi nazioarteko kazetariak egin du analisia.

Pentsioen erreforma onetsi eta tramiterako onartu zuen Madrilgo Kongresuak joan den astean, lege proiektua gisa onetsi dute erreforma. PSOE eta Unidas Podemosen koalizio gobernuaren ohiko bazkide gehienek erreformaren alde bozkatu zuten, bada, Iñigo Aduriz eldiaro.es kazetaria Haimaka Telebistan izan dugu.

Asteburu honetako kirol albisteak izan ditugu hizpide Jon Hernandez kirol kazetariarekin. Athleticen eta Realaren partidak izan ditu hizpide, eta nabarmendu du Athleticek galdu egin zuela nahiz eta itxura ona eman. Berdinketako gola sartzea lortu bazuen ere, baliogabetu egin zuten haren gola.
Realak, berriz, berdindu egin du Mallorcaren aurka, 1 eta 1. Bigarren gola sartu zuen talde txuri-urdinak, baina Martinez Munuera epaileak baliogabetu egin zuen Robin Le Normanden gola. Ostegun honetan jokatuko du Europako Ligako Romaren aurkako bueltako partida Reale Arenan.
Lucas Egibarrek snowboard kros probako Munduko Kopa irabazi du, eta Hernandezek nabarmendu du ohorezko postu hori defendatu beharko duela hemendik aurrera. Sierra Nevada leku “aproposa” da Egibarrentzat, bertan irabazi zuelako urrezko domina 2020. urtean ere. Hain zuzen, bosgarren urrezko domina eskuratu du donostiarrak.