Karmele Aierbe euskaltzale ataundarra zendu da, gaixotasun luze baten ondorioz. Ogibidez irakaslea zen baina gaztetatik bere ibilbidea miltantzia politikoarekin uztartu zuen, euskara eta euskalgintza ardatz, borroka eta feminismoari lotuta.

EHE erakundeko koordinatzaile izan zen 80ko hamarkadaren bukaeran eta 1998an HBko mahai nazionaleko kide aukeratua izan zen.

2019an, bere ibilbide politikoari eskainitako omenaldia jaso zuen Ataunen; eta 2021ean, UEMAk ere omenaldia egin zion euskararen alde egindako lan guztiagatik.

Otsailaren 16an egingo zaio azken agurra, 18:30ean, Ataungo San Gregorio auzoko pilotalekuan.

'Testuinguruak bilduma batetik abiatuta' programaren barruan aurkeztu dute erakusketa Gasteizko Artium museoan. Marrazkia eta oharra daude ‘Cuerpos por un momento’n jasotako lanaren jatorrian, eta artistaren ibilbideko hainbat unetan egindako bideoak dira. Maiatzaren 29ra arte izango da ikusgai.

2020ko otsailaren 6an milaka tona lur eta zabor amildu ziren Verter Recycling enpresak kudeatzen zuen zabortegitik behera. Luiziak arrastaka eraman zituen Alberto Sololuze eta Joaquin Beltran langileak. Amiltzearen ondorioz, gainera, dioxina, furano eta metal astunez bete ziren eskualde jendetsu baten airea, lurra eta ura.

Zabortegia 2011n hasi zen hondakinak jasotzen eta 35 urtez betetzea aurreikusten zuen, 2046. urtera arte. 2012an 185.000 tona hondakin jasotzetik 2018 eta 2019an 500.000 tona baino gehiago jasotzera igaro zen. Urte horietan Araban, Bizkaian eta Gipuzkoan hondakin gehien pilatu zutenak izan ziren.

Sexu-genero aniztasunean fokoa jarrita, Lumagorri zisheterosexismoaren aurkako taldeak antolatutako erakusketa aurkeztu du Julen Eizagirre amurrioarrak. Historiari erreparatu, eta izan diren sexu eta genero aniztasunen formak eta borrokak azaleratu dituzte erakusketan, normalizatua dagoen araua abiapuntu.

Txaro Arrazolaren 'Una magnífica explotación' erakusketa ikusgai dago Gasteizko Artium museoan dagoeneko. Artistak bere New Yorkeko estudioko leiho handitik ikusten zituenak margolan bihurtu, eta horiekin bilduma sortu du. Erakusketa martxoaren 13ra arte izango da ikusgai.

Pello Zabala fraide frantziskotarra, idazlea, euskaltzalea eta eguraldi iragarlea hil da, 78 urterekin. 1943. urtean jaio zen, Amezketan, eta 10 urte zituela iritsi zen Arantzazuko santutegira. Ordutik, 69 urte eman ditu bertan. Filosofia ikasi zuen, Erriberrin, eta ondoren Teologia, Arantzazun. Irrati esatari gisa ere aritu zen, hasieran musika saio batean eta gero, eguraldi iragarpenak egiten. Seminarioan irakaslea ere izan zen 1990era arte. Euskara, gaztelania, latina eta frantsesa irakasten zituen. Euskal kultura eta Euskal Herriarekiko konpromiso irmoa erakutsi izan du beti Pello Zabalak.