Gorka Ortiz de Zarate ikertzaile gasteiztarrak Taylor Domina jaso du eta eta sari hau jasotzen duen lehenengo euskalduna da. Produkzio Ingeniaritzako Nazioarteko Akademia Taylor dominarekin saritu zuen Gorka Ortiz de Zarate ikertzailearen lana. Ortiz de Zaratek 29 urte ditu, gasteiztarra, eta sari hau jasotzen duen lehenengo euskalduna da. Mondragon Unibertsitatean egiten ditu ikerketa lanak beste zenbait ikertzailerekin.
Uda lehorra izan da eta lehorteak izugarrizko eragina izan du lehen sektorean. Alabaina, gatzaren ekoizpenak gora egin du. Añanako Gatz Haranak 5.500 larrain ditu baina ez dira guztiak erabiltzen hainbeste gatz ez delako behar. Bertan, Gatz Haranan, 40-50 langile daude eta udaberritik udaren amaierara arte gatza jasotzen dute. Aurten, inoiz baino lehenago bildu dute ekoiztu behar duten kopurua.
Telebista Festibala urte luzez antolatu izan da Arabako hiriburuan, hainbat telesailetako protagonistak hurbildu dira Gasteizko Printzipal Antzokira euren sail berriak aurkeztera. Hala ere, bi urte gogorrak bizi izan ditugu eta pandemiak izugarrizko eragina izan du kultura- ekitaldietan. Egitarau zabala dute aurtengo ediziorako, Printzipal Antzokira bueltatuko dira estreinaldi guztiak, baita Amaierako Gala ere.
Desgaitasunen bat duten Arabako pertsonen elkarteak, Eginaren Eginezek, hezur-muineko lesioak prebenitzeko kanpaina jarri du abian gasteiztar guztiei zuzenduta, baina bereziki gazteei bideratuta, kaltetuek 16 eta 35 urte artean izaten baitituzte. Igor Nabarro Break elkarteko kideak elkartean prebentzioa eta osasuna lantzen dituztela azaldu du eta kontutan izan beharreko faktoreak azaldu ditu.
