Skip to main content

txapelketa

Berdintasuna nagusi Bizkaiko bertsolari txapelketako finalisten artean

2018-12-11
Azkenaldiko finalik parekatuena izango dela adierazi dute Bizkaiko Bertsolari Txapelketako 8 finalistak . Faboritorik gabeko finala dela azpimarratu dute partehartzaileek eta antolakuntzak. Maila aldetik denak parean daudela eta uneko egoera psikologikoak erabakiko duela finala nabarmendu dute gehienek. Aitor Bizkarra lehenengoz arituko da Bizkaiko final batean. Berarekin batera, Eneko Abasolo (2010an finalista) eta 2016ko finalean egondako beste 6 bertsolari lehiatuko dira larunbatean Bilbao Arenan, 17:00etatik aurrera, Jon Enbeitak jantziko duen txapela irabazteagatik.
Masters Codere finaleko jaialdiak estreinatuko du Nafarroa Arena

2018-09-13

Gizonezkoen esku pilotako lau eta erdiko txapelketa hasterako, besteak beste, zaleek Codere Masters lehiaz gozatzeko aukera izango dute. Asteazkenean aurkeztu dute Iruñeko Nafarroa Arena pilotaleku berrian, bertan jokatuko baitute finala irailaren 29an, eta hori izango da frontoia estreinatuko duen partida.

2009an hasi zituzten eraikitzeko lanak, eta zazpi urtez itxita egon eta gero egingo dute lehen finala. Jaialdia 17:45ean hasiko da eta finalaren aurreko partidan Retegi Bi eta Ruiz Peñaren eta Mariezkurrena II.aren kontra arituko dira. Jaialdiko sarrerak orain urtebete jarri zituzten salgai, eta 200 baino gutxiago geratzen dira.

Codere Masterseko finalerdiak irailaren 26an eta 27an jokatuko dituzte, Iruñeko Labrit pilotalekuan. Lau bikotek parte hartuko dute torneoan. Eskuzko Pilota Enpresen Ligako sailkapenean lehen postuetan dauden hiru atzelariek eta aurrelariek osatuko dituzte lehen hiru bikoteak. Azken bikotea osatuko duten bi pilotariak, berriz, liga horretako Kirol Batzordeak erabakiko ditu, gonbidapen bidez.

Sanmateoetako torneoa izango da Eskuzko Pilota Enpresen Ligako sailkapenean puntuak emango dituen azkena. Edonola ere, Jokin Altunak, Beñat Rezustak eta Jose Javier Zabaletak aurrez daukate ziurtatua Iruñean jokatzeko aukera. Altuna III.a da sailkapeneko buru eta Rezustarekin, lehen atzelariarekin, osatuko du bikotea.

Zabaletak itxaron egin beharko du bikotea zeinekin osatuko duen jakiteko. Aimar Olaizola da aukera gehien duen aurrelaria, baina Joseba Ezkurdia eta Danel Elezkano ere aukerekin daude. Atzelarien artean, Jon Ander Albisu, Julen Martija eta Ander Imaz dira torneoa jokatzeko faborito nagusiak. Edonola ere, esan bezala, Sanmateoetako ferian erabakiko da nork izango duen torneoa jokatzeko aukera.

 
bannerra

bannerra