Skip to main content

Bilbo

Martxan da Darabilbo programaren iraileko edizioa

2020-09-17
Aisialdian euskararen erabilera sustatzea helburu duen ekimena berriz heldu da Bilbora oporrak eta gero. Programa Bilboko Udalaren eskutik dator, Euskara eta Hezkuntza Sailaren bitartez eta Hiriko Euskaltegi Sarearen lankidetzaz. Asmoa, euskara ikasten ari direnen artean zein benetan euskaraz bizi nahi dutenen artean hizkuntza suspertzea da. Horixe nola egiten den azaldu du Aitor Argote programaren kideak.
“Alerta gorrian” dagoela salatu du ikuskizunen sektoreak

2020-09-18
Bilbon, Gasteizen eta Iruñean kultur arloko profesionalak kalera atera dira bart ikuskizun eta ekitaldi "seguruak" aldarrikatzeko. Muga mugan dagoen sektorea da, pandemiak gogor jo duena. Gobernuari eta Lan, Ogasun, Gai Ekonomiko, Kultur, Kirol, eta Industria sailei eskatzen diete datozen asteetan sektoreen honen iraupena bermatzeko urgentziazko neurriak hartu ditzaten. Baita, haien esanetan, “beharrak aztertuko dituen mahai sektoriala berehala sor dezaten” ere. Sektorean oraindik langabezia-zifrarik ez duten arren, aurreratu dute data hauetan gauzatutako lan-bolumena % 10ekoa dela aurreko urteekin alderatuta.
Ane Santesteban eta Lourdes Oyarbide txirrindulariek Munduko Txapelketan hartuko dute parte

2020-09-17
Gema Pascual Espainiako selekzioko hautatzaileak asteazken honetan eman du deialdia 2020ko Munduko Txapelketarako. Imolan egingo da Mundiala irailaren 24tik 27ra. Ane Santesteban eta Lourdes Oyarbide izango dira euskal ordezkariak, Giro Rossan eta Le Tour d’Ardechen parte hartu ostean, hurrenez hurren. Oyarbide arabarrak erlojupekoan parte hartuko du irailaren 24an. Santesteban gipuzkoarra, iraupen lasterketan arituko da.
Covid19ak ekonomia jomugan

2020-09-17
Greba eguna dute gaur Zamudioko ITP Aeroko langileek. Goizean goiz hasi dute protesta eguna manifestazio batekin. Izan ere, gogor astindu du covid19ak ekonomia. Horri irtenbidea ematen hasi nahian, Idoia Mendia Lan eta Enplegu sailburu berriak bilera erronda hasi du patronalarekin eta euskal sindikatu nagusiekin. Gaur Mitxel Lakuntza ELAko idazkari nagusiarekin bildu da. Bestaldetik, CGT sindikatu frantziarrak Emmanuel Macronen Gobernuaren politika salatzeko dozenaka hiriburutan manifestazio deialdiak egin ditu gaur; izan ere, erreformak eta neurriak bultzatzea leporatu diote, pandemiaren ondorioz sortutako krisia saihesteko.
Arantza Campos (Plazandreok): “Berdintasun politika seriotasunarekin hartu behar da”

2020-09-16
Emakunderen kokapen organikoa aldatu egin da Eusko Jaurlaritzaren egitura berrian, eta aurrerantzean ez da egongo Lehendakaritzari atxikita. Iñigo Urkullu Jaurlaritzako lehendakariak bere sailetik atera du institutua, eta Gizarte Politiken Sailaren esku utzi du. Erabakiari kritika zorrotzak egin dizkiote talde feminista ugarik. Besteak beste, Euskal Herriko 70 talde feministak baino gehiagok agiri bateratu bat kaleratu dute neurria salatzeko. Plazandreok plataformak ere bat egin du idatziarekin. Eta, kide den Arantza Camposek azaldu bezala, «hanka sartze itzela» izan da Jaurlaritzak hartu duen erabakia. Gainera, gehitu duenez, ez dago ulertzerik aldaketa zertara datorren.
Israelgo Gobernuak "Abrahameko Akordioak" sinatu ditu Arabiar Emirerri Batuekin eta Bahraingo Erresumarekin

2020-09-16
Donald Trump Ameriketako Estatu Batuetako presidenteak atzo adierazi zuenez, "beste bost herrialdek" laster harreman diplomatikoak izango dituzte Israelekin. Izan ere, Etxe Zurian Israelgo Gobernuak Arabiar Emirerri Batuekin eta Bahreinekin "Abrahameko Akordioak" sinatu zituzten atzo. Palestinarrentzat eta estatu bat eratzeko asmoentzat "labankada" izan dena.
 
bannerra

bannerra