Skip to main content

Bilbo

Gizarte ekimeneko langileek 22. greba eguna egin dute

2019-04-01
Apirilaren 1etik 4ra 9.000 langile daude grebara deituta. Joan den astean patronalarekin egindako azken bileran akordiotik oso urrun daudela adierazi zuten sindikatuek, Kristau Eskolak proposamen berririk ez baitzuen egin haien ustez. 10 urte darama sektoreko hitzarmena berritu gabe eta lan karga jasanezinak eta soldatak izoztuta izatea salatzen dute langileek. Apirileko lau egun hauetaz gain, maiatzaren 8 eta 9an ere greba egingo dute konponbiderik ez bada azaltzen horren aurretik.
Bilboko EH Bilduk "hiritarren eskariak" aintzat hartzen dituen zerrenda osatu du Udalerako

2019-04-01
Esan dute nagusiak gogoan izanda bihotz gazte batetik sortu nahi izan dutela zerrenda. Azaldu dute garrantzitsua ez dela nork gobernatzen duen edo nork daukan agintea. Azpimarratu dute helburua dela herritarrekin elkarrizketa bultzatzea, politikariak eta herritar oro maila berean daudelarik. Azaldu dute Bilborentzako ez dela ideia loriatsuak izateko garaia baizik zintzoak izateko eta herritarren defentsan aritzeko garaia dela. Gidalerro hauen baitan sortu dute Udalerako zerrenda. Adierazi dute Bilboko identitatea mantendu nahi dutela eta herritarren oinarrizko eskubideak mantendu.
Bilbao Arte Sakratua (BAS) jaialdia ospatuko da apirilean “Egurra eta soka” izenburupean

2019-03-29
15.edizio honetan nazioarteko ospea duten tradizio handiko taldeak egongo dira. Bilboko Korala, She´Koyokh, La Grande Chapelle, Singer Pur eta Conductus Ensemble dira aurtengo programazioan egongo diren taldeak. Antolatzaileek adierazi dute familia osoari zabaldu nahi diotela egitaraua eta horren parte da Claroscvro antzerki konpainiaren Perdida en el Bosco ikuskizuna. Aurten arte sakratuarekin edo musika barrokoarekin erlazionatutako kontzertu edo espektakuluetatik harago doa jaialdia. Bilbao 700 fundazioak antolatu duen egitarauan esperientzia izango da garrantzitsua. Fundaziotik azaldu dutenez, kontzertu eta ekitaldietan parte hartzaileekin interakzioa bultzatu nahi izan dute esperientzia eta sentsazio positiboen bitartez. Apirilaren 9tik 16ra bitartean ospatuko da jaialdia Atxuriko Gizakunde Elizan.
Hainbat herri kirol uztartzen dituen "5 Kirol" txapelketa aurkeztu dute

2019-03-29
Herri kirolei freskotasun berri bat emateko helburuarekin, BasqueSports-ek, Aitzol Atutxa aizkolariarekin enbaxadore lanak egiten, 5 herri kirol batuko dituen herri kirol binakako txapelketa aurkeztu dute gaur Bilboko Euskal Museoan. Bikoteka lehiatuko da eta bost herri kirol uztartuko ditu, gure kirolak ikusgarriagoak eta arinagoak egiteko. Modalitateak harria jasotzea, aizkora, txinga erutea, ingudea altxatzea eta trontza izango dira, jarraian egiteko moldatuak, bai kilo, jasoaldi eta mozketetan, dinamismoa bilatzeko eta ikuslearentzako are erakargarriagoak egiteko.
Iberdrolaren irabaziek herritarren miseria eragiten dutela salatu dute Bilbon

2019-03-29
'Euskal Herriak kapitalari planto' plataformak deituta, hainbat herritarrek elkarretaratzea egin dute Bilboko Euskalduna Jauregiaren aurrean, Iberdrolako akziodunen batzarra aitzaki hartuta. “Zuen aberastasuna gure miseria” lelopean, Iberdrolak espazio publikoak okupatzen dituela salatu du plataformak eta, bide batez, instituzioei egotzi diete "alfonbra gorria" jarri izana. Elektrizitatearen sektoreko monopolioa baliatuz, herritarren fakturarekin nahi dutena egiten dutela ere salatu dute.
EHUren aurtengo udako ikastaroek gizarte erronkei irtenbideak bilatzen saiatzeko topagune izan nahi dute

2019-03-29
38.edizioa da aurtengoa eta ingurumena babesteko Iraunkortasunerako Foroa sortuko du unibertsitateak BBVA fundazioarekin batera. Honen ardatz nagusiak klima aldaketa, aniztasunaren babesa eta bioetika izango dira. Miramarren, Donostian izango da foroa. Gai honen baitan arituko dira udako ikastaroen edukiak, baina eztabaidagai eta ikergai izango dira esaterako, Historia, Euskal Kultura edo Delinkuentzia mota berriak. Uda Ikastaroen zuzendari akademiko berria den Itziar Alkortak hartu du Carmen Agouésen testigua. Udako ikastaroan parte hartzeko matrikula gaur ireki da eta maiatzaren 31 bitarte murriztua izango da.
 
bannerra

bannerra