Donostia

EH Bilduk langabezia eta pobreziari aurre egiteko 150 neurri aurkeztu ditu gaur Donostian. Egungo egoera ekonomiko eta soziala larritzat jotzen du koalizioak, eta horri buelta emateko proposamen zehatzak aurkeztu ditu. Hamar ataletan banatu dituzte 150 proposamenak, hiru oinarriren baitan: burujabetza praktikan jartzea, orain arteko norabidearen kontrako neurriak hartzea, eta eredu sozial berri bat eraikitzea.

Iñaki Errazkin Gipuzkoako Foru Aldundiko Ingurumen diputatuak lur beltz antzeko material bat erakutsi du gaur Batzar Nagusietan. Foru gobernuaren hondakinak kudeatzeko planaren ardatzetako bat Zubietako hondakinak tratatzeko planta izango da, eta bertatik antzeko materia inertea aterako litzatekeela esan du Ingurumen diputatuak: usainik gabekoa eta lixibarik sortzen ez duena. Oposizioko kideek errezeloz hartu dute Errazkinen agerraldia.

Atzo egindako mahai ingurua "Norabidea" blogaren aurkezpen ekitaldia izan zen. Jaume Lopez politologoa, Rita Marzoa kazetaria eta Salvador Cardus soziologoa izan ziren protagonistak. Independentziaren aldeko hautuaz hitz egin zuten.

Bi epairen artean preso egindako denboraren likidazioak ez du eragin praktikorik izango gehienezko zigorra duten presoen kasuetan. Bi presoren eskaerei emandako erantzuna izan da, baina horien abokatuek jakinarazi dute helegitea aurkeztuko dutela eta Estrasburgora jotzeko prest daudela.

Maiatzaren 1aren atarian, Sortuk eredu sozioekonomiko berri baten aldeko aldarrikapena egin du. Europak eta Espainiak ezartzen duten eredu neoliberala alde batera utzi nahi badu, Euskal Herriak bere bidea gauzatzen hasteko garaia duela azpimarratu dute. LABek maiatzaren 1erako antolatu dituen mobilizazioetan parte hartzeko deia egin du alderdiak.

Lokarrik azaldu du bere helburua ez dela gatazkako arazo guztiak bukatu arte lan egitea, hurrengo hogei urteetan euren esanetan amaituko ez direlako. Berria-ri jakinarazi dio bere lehentasuna "bakea eta elkarbizitza" lortzea dela, beste edozein gairi heldu aurretik; esaterako kontsultari.