Skip to main content

Gurean Gaur

Carola Rackete Sea Watch 3 ontziko kapitaina atxilotu dute pertsonen trafikatzaileei laguntzen ari dela egotzita

2019-07-01
Kapitaina ikerketapean jarri du Italiako Fiskaltzak. Izan ere, duela bi aste 42 migratzaile erreskatatu zituen Mediterraneo itsasoan eta hauek lurreratzeko intentzioz Italiako uretan sartu. Matteo Salvini Italiako Barne ministroak duela urtebete ezarri zuenaren arabera, migratzaileak daramatzaten GKEen ontziek debekatuta daukate Italian porturatzea. Lampedusa uharteko portuan lehorreratu zuen ontzia Carola Racketek agindu hauei entzungor eginez. Ondorioz, larunbatean portuan sartu eta batera atxilotu egin zuten. Racketek, itsasotik Skype bidez eman zituen adierazpenetan esan zuen, ontzian zeuden etorkinak geroz eta okerrago zeudela, bai fisikoki, baita mentalki ere. Nabarmendu zuen, Lampedusa zela gertu zegoen porturik seguruena. Gaineratu zuen Maltak lehorreratzeko baimena ukatu ziola eta Frantziak ez zuela erantzun. Bien bitartean, Giussepe Conte Italiako lehen ministroak iragarri zuen Alemania, Portugal, Frantzia eta Luxenburgo daudela Sea Watch 3-ko migratzaileak hartzeko prest.
Donostiako Udalak adierazpen bateratua egin du Ekainaren 28aren harira

2019-06-28
Ekainaren 28aren harira, Udal-adierazpen bateratua irakurri dute gaur Donostian udalbatzan ordezkaritza duten alderdi politiko guztiek. Nazioarteko LGTBI+ eguna dela eta udaletxean jarritako ortzadar bandera bat balkoian jarrita, eta are bandera handiago bat lurrean zabalduta, duela 50 urte New Yorkeko StoneWall Inn-en izandako sarekadak eragindako istiluak gogoan hartuta ekin diote ordezkari politikoek adierazpena irakurtzeari. Bederatzi puntutan banatutako adierazpena EAJ, PSE, EH Bildu, PP eta Elkarrekin Donostiako ordezkariek irakurri dute hurrenez urren. Adierazpena ber bateratua izan den arren, ekitaldiaren amaieran PPko ordezkarien jarrera salatu du Aitzole Araneta, elkarrekin Podemoseko zinegotziak.
Aitzole Araneta: "PPren jarrera ez da onargarria eta salatu egin behar da"

2019-06-28
Donostiako Udaleko alderdi politiko guztiek adierazpen bateratua egin dute gaur ekainaren 28aren harira. Aitzole Aranetak PPren jarrera salatu du: "Atzo Eusko Legebiltzarrean gauza -bat egin, eta gaur beste bat esan du PPk. Hori ez da onargarria eta salatu egin behar da".
Javi Salgadok agur esan dio saskibaloiari jokalari moduan

2019-06-28
Negar artean iragarri du Bilbao Basketeko base mitikoak jokalari izateari utzi eta Alex Mumbrú entrenatzailearen talde teknikora pasako dela datorren denboralditik aurrera. Erabaki zaila izan dela onartu du prentsaurrekoan baina unerik egokiena zela sinetsita hartu duela. 12 denboraldi jokatu du Bilbon eta beste sei Gipuzkoa Basket eta Estudiantes taldeetan.
Askatasun sexuala harrotasunez aldarrikatzeko eguna ospatzeko agerraldia egin du Iruñeko Udalak

2019-06-28
Askatasun sexuala harrotasunez aldarrikatzeko eguna ospatzeko agerraldia egin du Iruñeko Udalak udal plazan. Enrique Maya Iruñeko alkateak ez du bertan parte hartu. Udalak eskubide-berdintasunaren alde zein sexu-orientazioak eragindako bazterkeria ezabatzeko lan egiteko konpromisoa berretsi du.
Joseba Gabilondo: "Sistema cis sexista honek denok sartzen gaitu kaiola batean"

2019-06-28
Sexu Askapenaren Nazioarteko Eguna da gaur. 50 urte betetzen dira Stonewallen erreboltak izan zirenetik. Esaten da, hura izan zela gaur egungo LGTBIQ+ mugimenduaren hastapena. Besteak beste, ospakizunez, aldarrikapenez edo kolektiboak Euskal Herrian egunerokotasunean bizi dituen erasoez hitz egin dugu Joseba Gabilondo Hiruki Larroxako kidearekin.
 
bannerra

bannerra