Skip to main content

Gurean Gaur

Ziklo itxieraren berri eman die ETAk hainbat erakunderi

2018-05-02

ETAk bere zikloaren berri emanez gutun bat bidali die instituzio eta ordezkari politikoei. Eskutitzean, erakundeak amaitutzat eman du 2010ean hasitako prozesua. Hori bai, nabarmendu du gatazka ez zela ETAren sorrerarekin hasi, eta ez dela ETA desegitean amaituko.

Azken urteetan gatazka amaitzeko egindako ahaleginak hutsean amaitu direla dio idatziak, eta erantzukizunaren zati bat bere gain hartzen du erakundeak. Gatazka behin betiko amaitzeko aukera gisa aurkezten du honakoa taldeak, eta etorkizuna "elkarlanean" eraikitzeko deia egiten dio euskal gizarteari.

Gaur jakin dugu, bestalde, Eusko Jaurlaritzako lehendakari Iñigo Urkullu ere harremanetan jarri dela Harremanetarako Nazioarteko Taldeko kideekin gutun bidez. Eskerrak eman dizkie egindako lanagatik, Josu Erkoreka Jaurlaritzako bozeramaileak baieztatu duenez. 

Horrez gain, Eusko Jaurlaritza eta Nafarroako Gobernua ETAren azken adierazpenaren balorazio bateratua egiteko aukera aztertzen arituko lirateke. Hala iradoki dute Erkorekak berak eta Maria Solana Nafarroako Gobernuko bozeramaileak.

Donostiako Zinemaldiko artxiboa egokitu eta publikoaren eskura jarriko dute

2018-05-02

Donostiako Zinemaldiko artxiboa egokitu egingo dute, bertako edukia libreki kontsultatu ahal izateko. Elias Querejeta zine eskola, Euskadiko Fimategia eta Tabakalera batu dira 'Istorio posible guztiak' proiektuan. Proiektuaren lehen fasea 2022an amaituko da, eta Zinemaldiaren 70. urtemugarekin bat egingo du.

EGUNEKOA: maiatzaren 2ko albiste nagusiak

2018-05-02

Ostiralean Kanbon egingo den nazioarteko topaketaren bezperetan, geroz eta xehetasun gehiago jasotzen ari gara ETAren amaieraz. Gaurkoan, erakundeak ordezkari eta instituzio politikoei igorritako gutunaren berri izan da. Horrez gain, erreparatu diogu Eneko Compains torturatzea egotzita epaitu dituzten Guardia Zibilen auziari ere. Egunak albiste beltza ere utzi du, Bidarten emakume bat hil dutelako eta haren gizonezko bikotekidea atxilotu dutelako. Gainera, kultura eta kirol gaiei ere erreparatu diegu.

Feminismoa eta pentsiodunekin bat maiatzaren lehenan

2018-05-01

Maiatzaren lehenarekin, sindikatuak kalera atera dira langileen eskubideak aldarrikatzeko. Aurten, aldarrikapen nagusiak mugimendu feministarekin eta pentsiodunen eskubideekin lotuta izan dira.

 

Eta duela 35 urte, Nerbioi ibaitik gabarra bat jaitsi zen

2018-04-30

1983ko maiatzaren lehena, ezustean, Athletic-ek Liga irabazi zuen. Real Madrilek Valentzian galdu zuen eta zuri-gorriek Las Palmas garaitu zuten, ondorioz bizkaitarrek txapeldun izan ziren. Juan Carlos Latxaga kazetaria bertan egon zen, Egin egunkariarentzat lanean. Garaipen horrek, segida izan zuen Bilboko kaleetan. Izan ere, inoiz ikusi gabeko espektakulua heldu zen: Gabarra.

 
bannerra

bannerra