Skip to main content

Gurean Gaur

Lan hitzarmenaren defentsan, bi eguneko greba Bizkaiko bulego eta langeletan

2018-04-24

Bizkaiko bulegoetako eta langeletako langileek greba egingo dute asteazken eta ostegunean. ELA, CCOO, LAB, UGT, ESK, CGT eta CNT sindikatuek egin dute greba deialdia, lan hitzarmenaren alde. Horrez gain, apirilaren 9tik, 'Bulegunea' dute ezarrita Arriagan, borroka sindikala gizarteratzeko.

EGUNEKOA: apirilaren 24ko albiste nagusiak

2018-04-24

Maiatzaren 4an, Kanboko Arnaga etxean, ETAren amaiera irudikatzeko egingo den nazioarteko topaketan ez da Eusko Jaurlaritzako ordezkaritzarik egongo. Politika arloan, arreta puntua izan da hori gaurkoan. Horrez gain, Altsasuko auziaren zazpigarren saioak ere eman du zeresana. Gizarte arloan, Bizkaiko bulegoetako eta langeletako langileen greba deialdiari erreparatu diogu; baita Deustuibarrako 'Bizinahi' egitasmoari ere. Horiez gain, kultura arloko zenbait gai jorratu ditugu.

Mendi Tour Iruñera iritsi da

2018-04-24

Bilboko Mendi Film Festival-a urte osora zabaldu dute eta horri esker zenbait herritan izanen dira ikusgai iaz edizioan hautatuko pelikulak. Birak Iruñera ekarri ditu aste honetan mendia, abentura eta natura uztartzen dituzten zenbait filme. Atzotik hasita eta ostegunera bitarte izanen da aukera horiek ikusteko Golem Baiona zineman.

 

Kataluniako salbuespenezko egoera politikoak ezaugarritu du aurtengo Sant Jordi eguna

2018-04-23

Izatez, liburuen eta larrosen Sant Jordi eguna izaten dena, 155. artikuluaren ezarpenak baldintzatu du Katalunian. Bartzelonako kaleak horren erakusle: larrosa hori-gorriak saldu baitituzte postu bat baino gehiagotan. Salbuespenezko egoera hori medio, lehen aldiz, Generalitatean ez dute urteroko ekitaldi instituzionalik egin. Hori bai, Carles Puigdemont Kataluniako Generalitateko presidente kargugabetuak eguna baliatu du Berlindik katalanei mezua bidaltzeko.

Kanbo izango da Aieteko Adierazpenaren eta Baionako armagabetzearen hurrengo mugarria

2018-04-23

ETA erakundearen desmobilizazioaz xehetasunak emateko Bake Bideak, Foro Sozial Iraunkorrak eta Nazioarteko Harremanetarako Taldeak Baionan egin duten agerraldian,gogora ekarri dute 2011n, Aieten, "Europako azken gatazka armatuaren inguruko bake justu eta iraunkorra erdiestea" posible dela "sinetsita" zeudela. Hango bide orriari jarraiki iritsi dira maiatzaren 4ko topaketetara. Eta tartean, beste data bat jarri dute gako gisa: iazko apirila, hau da, ETAren armagabetzea.

Baionako agerraldian Ipar Euskal Herriko ordezkari ugari egon dira. Hain zuzen, Anaiz Funosasek jakinarazi du Kanboko konferentziak ere babes talde bat izango duela eta talde horretan izango direla Jean Rene Etxegarai Euskal Elkargoko lehendakaria eta Baionako auzapeza, Kotte Ezenarro Hendaiako auzapeza, Alain Iriart Hiriburuko auzapeza, Max Brisson senatari errepublikarra, Frederique Espagnac PSko senataria, eta Florence Lasserre-David naiz Vincent Bru Moderneko diputatuak.. Euskal Herriko alderdi, eragile eta gizarte zibila gonbidatu dute Kanbon egotera.

EGUNEKOA: apirilaren 23ko albiste nagusiak

2018-04-23

Bake Bideak, Foro Sozial Iraunkorrak eta Harremanetarako Nazioarteko Taldeak, ETAren amaieraz xehetasunak emateko, Baionan egin duten agerraldia izan da gaurko arreta puntuetako bat. Horrez gain, asteburuan preso politikoen eskubideen alde egindako ekitaldiek hartu dute garrantzia, politika arloan. Larragan frankismo garaian eraildakoei egindako omenaldiari ere erreparatu diogu.

 
bannerra

bannerra