Skip to main content

Gurean Gaur

NBA-ko agente libreen merkatua, hankaz gora

2019-07-02
Adituek diotenez, agian historiako kontraturik gabeko jokalarien merkatu onena izan litzateke, izarrez gainezka dagoena. Talde askok jada mugimenduak egin badituzte ere, tartean Kevin Durant eta Kyrie Irvin Brooklynekin sinatuz edo, nahiz eta agente librea ez den Anthony Davis LeBron James-en Lakersekin sinatuz, oraindik helmuga zehatzik ez duten jokalariak ere badaude. Hala ere, udako galdera hurrengoa izaten jarraitzen du: zer egingo du Kawhi Leonard NBA-ko irabazleak?
Hego Euskal Herrian langabeziak behera egin du azken hilabetean

2019-07-02
Hego Euskal Herrian langabeziak behera egin du azken hilabetean. Espainiako Estatuko Lan, Migrazio eta Gizarte Segurantza Ministerioak jakinarazi du maiatzean baino 3.417 langabe gutxiago dagoela lau lurraldeetan. Aurreko hilabeteko datuekin alderatuta, % 3,8 txikitu da Gipuzkoan, Nafarroan % 2,84 jaitsi da, Araban %1,86 eta Bizkaian % 1,6. Guztira, 141.719 langile dabil lan bila Hegoaldean. Bizkaian, 63.913 langabe daude, 30.376 Nafarroan, 28.797 Gipuzkoan eta 18.633 Araban. Udaren hasierari lotutako enpleguei esker zerbitzuetako langabezia gutxitu da 2.086. Industrian 283 txikitu da eta eraikuntzan ere bai 253, baina aurreko hilabeteetan baino gutxiago hala ere. Horrez gain, lana dutenen kopurua handitu egin da: bataz beste, 1.262.627 lagunek kotizatu zuten ekainean Gizarte Segurantzan, maiatzean baino 4.213 gehiagok eta duela urtebete baino 26.779 gehiagok. Bestalde, lana lortu dutenen gehiengoa behin-behineko kontratuekin ari da lanean. Ekainean sinatutako kontratuen %7,6 soilik izan dira mugagabeak.
Herri Sanferminak kolektiboak auzolanaren aldeko aldarria azpimarratu du

2019-07-02
Behin betiko egitaraua aurkeztu du Herri Sanferminak plataformak. Gaurko agerraldian kideek auzolanaren aldeko apustua berretsi egin dute eta Maya alkatearen mehatxuen aurrean, herritarren babesa dutela erantzun. Bizikidetza kezka izanik, zuzeneko musika emanaldiak lehenago amaituko dituzte. Oraindik 197 txanda betetzear daude eta horiek betetzeko laguntza eskatu dute.
Ekaineko bero boladak errekorrak hautsi ditu

2019-07-02
Ekainaren azken egunetako bero boladak mende honetako errekor ugari hautsi ditu Euskal Herrian. Tenperatura maximoak 2000 urtetik erregistratu diren altuenak izan dira EAEko 12 herritan, Euskalmet-en arabera. Esaterako, Bizkaian, Arangurenen eta Derion 41,1 eta 41 gradu erregistratu ditu Euskalmet-ek hurrenez hurren, aurretik ezarritako 40,7 eta 40,6 maximoen gainetik. Araban, Moredan 42,6ra heldu da termometroa, duela bi urteko maximoa baino 4 gradu gehiago. Zanbranan, 41,3; Paganosen, 40,9; eta Espejon, 40,5 gradurekin; errekorrak hautsi dira ere.
Arrate Illaro: "Oinarri ezinbestekoak dira herrietan osatuko diren herri batzordeak"

2019-07-02
Datorren udazkenean egingo da II. Euskaraldia, eta Arrate Illaro Euskaraldiko koordinatzailearekin hitz egin dugu aurtengo edizioaz eta dituzten erronkez. Ahobizi zein Belarriprest rolen garrantzia azpimarratu du Illarok: "Biak dira rol aktiboak, eta biak ditugu beharrezkoak". Era berean, herrietako batzordeen lana nabarmendu du.
11 urte bete dira Nagore Laffage erail zutenetik

2019-07-02
Bihar beteko dira 11 urte Nagore Laffage erail zutenetik. Iruñeko Condestable jauregian gogoratu zuten atzo.
 
bannerra

bannerra