Skip to main content

Gurean Gaur

EGUNEKOA: uztailaren 6ko albiste nagusiak

2018-07-06

Iruñean lehertu den bederatzi eguneko festaz gain, Eusko Legebiltzarrean onartutako EAErako Estatus Berrirako oinarriez eta Donostian desalojatu duten gazte lokal okupatu berriaz aritu gara gaurkoan.

Azken urteetako Tourrik gogorrena

2018-07-06
Iritsi da azkenean milioika kirolzalek egutegian gorriz azpimarratutako eguna. Bihar hasiko da 2018ko Frantziako Tourra eta uztailaren 29an jakingo dugu nor den txapeldun handia. 22 taldek parte hartuko dute eta aurtengoan 176 txirrindulari izango ditugu errepidean gogor lehiatzen, 21 etapaz osatutako lasterketa ospetsuenean. Parisera iristean elastiko horia jantzita eramatea inoiz baino garestiago dago aurten eta lasterketaren inguruko dudak argitzeko, Egoitz Lizaso zumaiarrarekin hitz egin dugu. Tropela webgune ospetsuaren sortzaileetako bat da Lizaso, eta faboritoen inguruan, ibilbideari buruz eta euskal txirrindularien rolari buruz hitz egin dugu berarekin, besteak beste. Hasteko, nola ez, Chris Froomen auziari buruz galdetu diogu. Ebazpena beranduegi iritsi dela eta lasterketa giro arraroan hasiko dela azaldu du Lizasok,zaleek txirrindulari britainiarrarengan jarrera gogorragoa izango dutela adieraziz. Faboritoei buruz hitz egitean, apustu guztietan Froome dagoela baina aurre egingo dioten txirrindulari asko daudela adierazi du. Roglic, Zakarin, Geraint Thomas edo Mollema bezalakoak ere gertu ibili daitezkeen arren, faboritoak baino maila bat beherago ikusten ditu Lizasok. Lehenengo astean atzean ez geratzea eta azken asteko etapa menditsuetan eta erlojupekoan ongi ibiltzea erabakigarria izango dela kontatu digu. Jadanik ez gara harritzen lasterketa ezagunenetan Ikurriñaren bat ikustean. Txirrindularitzak euskaldunon artean sortzen duen pasioaren inguruan ere hitz egin dugu. Aurtengoan 8 euskaldun izango ditugu tropelean eta hauengandik zer espero den galdetu diogu Lizasori. Bukatzeko, Tropelari buru ere hitz egin dugu. Lasterketa hasi aurreko azken egunak nola bizi dituzten kontatu digu eta webgunearen arrakastaren gakoei buruz galdetu diogu. Ezin jakin zer pasako den Tourrean. Baina milaka euskaldun telebistara begira egongo direla eta Tropelari esker, koadrila desberdinetan afari bat baino gehiago egongo dela jokoan garbi dago.
Europara itzuli asmoz, Athletic-ek jauzi kualitatatiboa eman du Yuri Berchicheren fitxaketarekin

2018-07-06

Zarauztarrak lau urtetako kontratua sinatu du talde zuri-gorriarekin. Horiek horrela, Berchichek PSG utzi eta hamabi denboraldi beranduago Lezamara itzuliko da. Astelehenean, Eduardo Berizzo argentinarraren aginduetara, lehoiek lanari ekingo diote berriz.

Uztailaren 13an Patin-gaua ospatuko da Gasteizen

2018-07-06

GAUA Uztailaren 13an Patin-gaua ospatiko dute Gasteizko kaleetatik, aurtengoa bigarren edizioa da. Nobedade moduan 15 km-ko ibilibide zirkularra izango da Berpizkunde plazatik hasi eta bukatuko dena, zezen plazaren. 22:30etan emango diote patin-gauri, baina 20:00 hasiko dute giroa berotzen hockey eta patinen gaineko dantza erakusketa  eginez, Momentos  taldeak zuzenean musikatuz.

Antolakuntzatik azpimarratu nahi dute,  ibilbidea ez dela lasterketa pista bat, horretarako taldearen buruan borondatezko irristatzeileak abiadura ezarriko dute jendeak era lasai eta adiskidetzu batean irristatzeko.

Uztailaren 13an agian askok oporretan egongo zarete  edo ez duzue aukera gasteizera hurbiltzeko, lasai , anolakuntzakoek iragarri digute Iraila eta urrian beste bi aukera egongo direla patin-gauan parte hartzeko

Aldamar kaleko lokal okupatua hustu dute ertzainek Donostian

2018-07-06

Bizilagunak biltzen hasi dira inguruan, eta gertatzen ari zena grabatzen hasi dira batzuk. Pertsona horiek identifikatzen hasi da polizia, tartean, Irutxuloko Hitzako kazetari bat. Alde zaharreko gazte batek ez du identifikatu nahi izan eta komisaldegira eraman dute.

Jendea errepidean eseri da atxiloketa saihesteko eta poliziak indarrez jo du haiengana. Udalak adierazi du “partikularren arazoa” dela. Lokalaren jabeak lokala berreskuratzea eskatu duela, eta polizia epailearen ebazpen bat betetzen ariko dela. Ba gazteek asanblada egiteko deialdia egin dute, 18:00etan, Aldamar kalean bertan eta 21:00etan, berriz, manifestazioa egingo dute Trinitate plazatik abiatuta.

Joan den larunbatean okupatu zuten Aldamar kaleko 32. zenbakiko lokala. Auzo lokal bihurtu nahi zuten gazteek, eta urte askoan hutsik egon den espazioa txukuntzen eta prestatzen ibili dira egunotan. Azken hilabeteetan, auzoko hainbat eraikin eta lokal “berreskuratzeko” saiakera egin dute gazteek. Esaterako, pasa den martxoaren 24an, Abuztuak 31 kaleko eraikin bat okupatu zuten, eta gazteek, orduan ere, poliziak ilegalki aterarazi zituela salatu dute asteburuan.

Adarretatik jaialdia Zarautzen, musikaren ertzak ukitzeko

2018-07-06

Sustatzaileen hitzetan, ez da edonolako jaialdia izango, musikaren ertzak ukituko baititu. Hiru agertoki izango dira horretarako: eguerditan, Merkatu Plazan, kaleko musika edo proposamen akustikoagaoak izango dira entzungai; arratsetan, Musika Plazan, euskal musika; eta gauetan, itsas pasealekuan, Borghetto parean eskainiko dituzte kontzertuak.

Guztira, dozena bat proiektuz gozatzeko aukera izango da hiru egunetan. Besteak beste, Sara Mansilla, Juan Valls, Oso Fan, Rafa Rueda, Buffalo, DJ Tahira edota Elkano Browning Cream taldeen doinuez gozatzeko aukera eskainiko dute. Zarauzko Udaleko Kultura sailaren eta Gipuzkoako Foru Aldundiko Katapulta programaren babesa izan dute, eta aurten estreinakoz antolatuko dute egitasmoari jarraipena eman nahiko liokete datozen urteetan ere.

 
bannerra

bannerra