Skip to main content

Azken bideoak: Ekonomia

bideoa prestatzen
LAB, lehen indarra Nafarroako administrazioko hauteskunde sindikaletan

2019-05-24
Nafarroako administrazioan egindako hauteskunde sindikaletan lehen indarra izatea lortu ostean, LAB-ek “eraldaketa sozial sakonagoa” eskuratzeko “urrats berri bat” emateko garaia dela aldarrikatu du. Zentral abertzalearen ustez, “patronalak, UGT-k eta CCOO-k dituzten pribilegioekin amaitzeko” unea da baita.
bideoa prestatzen
Elkarretaratzea egin dute Bilboko Udaleko hainbat langilek, pairatzen duten egoera salatzeko

2019-05-23
Langileek azaldu dutenez, lan ikuskaritzaren txostenaren arabera, udala langileak “erabiltzen” ari da estrukturalak diren lanpostuak estaltzeko eta zerbitzuak betetzeko. Langileek legez kanpokotzat jo dute Cinuvix enpresaren jokabidea: Bilboko Udalak kontratatutako enpresa horrek beste empresa bat azpikontratatu du udalaren zerbitzu bat betetzeko. Langileen Estatutuaren arabera legez kanpoko lagapena gertatzen da, justifikaziorik gabe enpresa batek azpi-kontratazio bat egiten duenean. Langileen esanetan, lan ikuskaritzaren txostenak “justifikaezintzat” jo du beste empresa bat kontratatzea, zuzenean udalak kontrataturiko enrpesari bai dagokio zerbitzua eskeintzea eta, beraz, baita langileak kontratatzea ere.
bideoa prestatzen
Bizkaiko metalgintzako grebaren jarraipena "handia" izan da, sindikatuen arabera

2019-05-23
Sektoreko lan hitzarmen berri baten alde ELA, LAB, CCOO eta UGT sindikatuek beste lau greba egun deitu dituzte ekainerako: 6an, 7an, 20an eta 21ean. Guztira, 50.000 langile daude greba egitera deituta. Mikel Etxeberria gehiengoa duen ELA sindikatuko bozeramaileak adierazi duenez, langileen erantzuna handia izan da, Bizkaian tamaina eta ezaugarri askotariko enpresak daudela kontuan izanda. CNT sindikatuak ere bat egin du borrokarekin nahiz eta deitzaileen artean ez izan. Hitzarmen berriaren negoziazioa ez aurrera ez atzera dagoela salatu dute sindikatuek. 2011koa da Bizkaiko metalgintza sektoreko azken ituna. Aldarrikapenen artean, 2018tik falta zaizkien atzerapenak jasotzea eta soldata igotzea daude. Patronalak, bere aldetik, gezurtatu egin du sindikatuek esandakoa. Manifestazioa Euskadi plazan amaitu dute, Bizkaiko metaleko patronalaren egoitzan. Gaurko greba egunaren ostean, ekainaren 3an egingo dute lan hitzarmena berritzeko hurrengo bilera.
bideoa prestatzen
Bizkaiko zaharren egoitzetako langileek zerbitzuaren pribatizazioa eta lan baldintza txarrak salatu dituzte

2019-05-21
Hirugarren adineko egoitzetako langileek elkarretaratzea egin dute Bizkaiko Foru Aldundiaren egoitzaren atarian zerbitzuaren pribatizazioa eta lan baldintza txarrak salatzeko. Erresidentzietan dagoen "pertsonal falta" eta kontratuen kalitate "eskasa" salatu du LABek. Jardunaldi partzialen eta behin-behinekotasun tasa altuak salatu dituzte. Bestalde, egoitzen %80aren kudeaketa pribatua duenez, sindikatuarentzat eskubide bat izan beharko litzatekeena, enpresa batzuen negozioa bilakatu dela adierazi dute.
bideoa prestatzen
Gipuzkoako diputaziora sartu dira zahar etxeetako langileak

2019-05-21
Beharginek hilabeteak daramatzate lan itunaren aldeko mobilizazioetan, iazko urritik. 5.000 langile inguru dira, gehienak emakumeak.LABek protesta hasi du foru aldundian, atarian eseri dira langile batzuk, eta kanpoan ere bildu dira babesa ematera. Diputazioaren egoitzan sartuaz batera, segurtasun zaindariak azalpenak eskatu dizkie: argazkirik eta zaratarik ez egiteko eskatu diete. Lurrean eserita jarraitu dute langileek, sirena eta txistu hotsa ateraz. Gaua pasatzeko ere prest daudela esan dute. Langileek hitzarmena nahi dute orain eta ez dira joango lortu arte. Mahai-negoziatzailea blokeatua dagoela gogorazi du LABek; ELAk, gehiengoa izanik, mahaia utzi baitzuen. Ertzainak ere agertu dira diputazioko atarira, protestako arduradunak identifikatu dituzte eta kazetarien lana oztopatu. Gaur hasi eta hilaren 25era arteko grebarako deia eginda dutela gogorarazi dute sindikatuko kideek, eta diputaziora sartzean egin duten urratsak ez duela atzera-bueltarik: ateratzen dituzten arte jarraitu nahi dute han.
bideoa prestatzen
010 Bilboko Udaleko zerbitzuko langileek 5. greba eguna dute gaur

2019-05-20
Lanalde enpresaren bidez azpikontratatuak dituen 12 langileek lanuzteekin jarraitzen dute beren lan baldintzak defendatzeko asmoz. Enpresaren eta Udalaren jarrera salatu dute. Salatu dute eduki duten kontaktu bakarra korreo elektronikoz izan dela. Bosgarren greba eguna izan da gaurkoa. Arreta zerbitzuko langile hauek kudeaketa eta argibideak ematen dizkiete herritarrei, galdera bakoitzari erantzun espezializatuak emanez. Beste sail batzuetara bideratu dute telefono bidezko arreta. Erantzungailu automatikoak ez du azaltzen langileak greban daudenik, arazo teknikoen ondorioa dela dio. Beren gainerako lanak ere automatizatu egin dituztela azaldu dute. Adierazi dute lerro gorririk ez daukatela, ez bada telemarketineko hitzarmenari uko egitea. Nabarmendu dute puntu guztiak negoziatzeko prest daudela.