1988ko abuztuaren 14an eman zuen Su Ta Gar taldeak bere aurreneko kontzertuak. Heavya euskaraz egin zitekeela frogatu ondoren, esperientzia ugari pilatuta, eibartarrek hiru hamarkada eman dituzte agertokietan. "Nostalgiarik gabe" eta "poztasunez", transmisiorako lana egin nahi dute, Euskal Herrian zein Madril, Bartzelona eta Berlin bezalako hiriburuetan egingo duten biran. Errepertorio berezia prestatu dute, euren maketa zein lehendabiziko bi lanetako abestiekin. Hortaz gain, emanaldietan, euren hastapenetako irudi ineditoak proiektatuko dituzte.