Abian da euskal ingurune digitaleko emakume gazteei zuzendutako Gladys Sariaren bigarren edizioa. PUNTUEUSek eta EHUko Informatika Fakultateak, Gipuzkoako Foru Aldundiaren babesarekin, eta Danobatgroup industria-taldearen laguntzarekin martxan jarri den saria da. 2022an gehienez 40 urte beteko duten emakumeei zuzenduta dago, eta ekimenean parte hartzeko bi modu daude: nork bere hautagaitza aurkeztu dezake edo hirugarren pertsona batek hautagaia izendatu dezake. Gogoratu izena emateko epea ekainaren 20ra arte egongo dela zabalik proiektuaren webgune ofizialean.