Thailandian larri gaixotutako Alex Garcia bizkaitarrak Gurutzetako ospitalean jarraitzen du. Igandean iritsi zen Espainiako Defentsa Ministerioak bidalitako hegazkin medikalizatuan Bilboko aireportura eta, handik, anbulantzian eraman zuten gertuen dagoen erietxera. Basauritarraren emaztea den Usoa Martinezek jakinarazi duenez, atzo bertan egin zioten ebakuntza kaltetutako pankrea zatia kentzeko. Zaintza berezien unitatean sartu dute eta errekuperazio aldi oso luzea izango dutela iragarri dute hura artatzen ari diren medikuek.
Ebakuazio-operazio konplexu baten ondoren, duela hilabete baino gehiagotik Bangkokeko Samitivit Sukunbit ospitalean zegoen gaixoa Bizkaiko ospitalera eraman zuten familiak hala erabakita, Loiuko aireportutik gertuen zegoen zentroa baitzen.
12 orduko hegaldiaren ondoren, hegazkina atzo arratsaldean iritsi zen Euskadira. Bertan, Osakidetzako anbulantzia bat zuen zain, bere egoeraren informazioa jaso eta ospitalera eramateko. Orain, bizkaitarra ospitale horretako Zainketa Intentsiboetako Unitatean (ZIU) dago.
Medikuek jakinarazi dutenez, gaixoa kontziente eta egoera egonkorrean dago, duela bi hilabetetik jasaten ari den sabelaldi-prozesuaren larritasunaren barruan. Medikuntza Intentsiboko taldearen ardurapean jarraitzen du bere tratamenduarekin. Hala ere, Basauritarrak pronostiko larria du eta eboluzioaren zain daude.

Marisol Garmendia Espainiako Gobernuak Euskadin duen ordezkariak aberriratzearen "arrakasta" azpimarratu, eta operazioan parte hartu duten taldeen lana eskertu du.