“Gaurtik begiratuta, biharko ikastolak irudikatzeko ordua dugu”, adierazi du Nekane Artola Ikastolen Elkarteko lehendakariak. Horretarako, Euskal Herriko ikastolen ordezkariak Iruñean bilduko dira ekainaren 22an, datozen zortzi-hamar urteetako erronkei aurre egiteko. Helburu nagusiak ezarriko dituzte bertan. Dagoeneko murgilduta daude eztabaida prozesuaren inguruko lanketan eta ikastolen esku utzi dituzte hiru dokumentu: VI. batzarretik ikastolek egindako ibilbidea jasotzen duena, ikastolei eta hezkuntzari eragiten dieten hainbat parametroren egungo egoeraren diagnostikoa egiten duen txostena eta zortzi-hamar urte barru ikastolak non eta nola ikusten dituzten eta toki horretara iristeko landu beharreko ildoak zeintzuk diren jasotzen dituen dokumentua. Orain, txosten horiek ikastolen esku daude; hala, VII. batzarrerako bidea marraztuko dutenak.