2021ean 20 urte bete ziren Mutrikuko Portu Berriaren Plan Zuzentzailea onartu zenetik. Plan horren helburu nagusia portuaren sarreraren eta irteeraren segurtasuna bermatzea zen, eta horri beste zazpi jarduera gehitu zitzaizkion. Horietatik, Kirol Portua izan da garapen handiena izan duena. Plan Zuzentzaile horretatik zetorren babes-kaia ez zen amaitu, eta bi hamarkadaren ondoren, Eusko Jaurlaritzak abian jarri nahi du berriro ere proiektua. Testuinguru honetan, proiektu hori geldiarazteko hainbat herritar bildu ziren iragan asteburuan, 'Dikea bai edo ez, erreferenduma orain!' lelopean.