EH Bilduko hainbat alkatek agerraldia egin dute astelehen honetan Gasteizen, eta etxebizitza politikaz mintzatu dira. Nagore Alkorta Azpeitiko alkateak eta Iñigo Hernando Galdakaokoak hartu dute hitza, eta adierazi dute “kontziente direla auzokideen kezka nagusienetako bat etxebizitza dela” eta gaineratu dute ezker subiranista “erabat konprometitua dagoela larrialdiari aurre egiteko”.

Agerraldian, zerbitzu publikoak mantendu eta zabaltzeko beharrezko baliabideak eskatu dituzte. Era berean, agintaldiaren azken urte honetan etxebizitzaren arloan gehiago eta hobeto jardungo dutela nabarmendu dute, baina horretarako errespetua beharrezkoa dela azaldu dute.

Bestalde, EH Bilduk ‘Posible 30k’ plana aurkeztu duela gogoratu dute, datozen hamar urteetan etxebizitza larrialdiari aurre egiteko, eta argi adierazi dute “etxebizitza ez dela negozioa, eskubidea baizik”.