Leixuri Arrizabalaga EAJko legebiltzarkidea elkarrizketatu dugu Hamaika Telebistan. Pentsioen erreforma izan du hizpide, eta nabarmendu du ez dutela horren inguruko eskumenik: “Nahi nuke pentsioen eskumena Euskadin izatea eta guk lantzea sindikatuekin eta eragile guztiekin, baina ez daukagu eskumenik”. Gehitu du hemengo pentsionisten “forma, modua eta lekua ez dela beti egokiena izan”, Euskal Herriko pentsionisten mugimenduak “Euskadin jarri duelako pentsioen fokua Madrilen jarri beharrean”.

Josu Etxaburu Gure Eskuko bozeramailea elkarrizketatu dugu Hamaika Telebistan. Puidgemonten aurkako auzibideak izan ditu hizpide, eta nabarmendu du Puidgemont “eskubide demokratiko bat gauzatzeagatik” zigortu nahi dutela. Bere esanetan, “politika egiteko modu baten porrota” gertatu da, eta porrot horren eraginez iritsi da auzia epaitegietara. Hori horrela, dio “kezkaz” bizi dutela “desordena deitzen dioten horretan egiten ari diren birmoldaketek askatasun eskubideari nola eragin diezaioketen”.

Rebeka Ubera EH Bilduko legebiltzarkidea elkarrizketatu dugu Hamaika Telebistan.

Olatz Kamara Satseko kidea elkarrizketatu dugu Hamaika Telebistan. Bere esanetan, langileek lan baldintza duinak izan behar dituzte, beren arreta “kalitatezkoa” izan dadin, eta Osakidetza benetan publikoa izan dadin.

Horrez gain, Kamarak salatu du mahai sektorialean Osakidetzak ez duela negoziatzeko borondaterik: “Guk aurkezten ditugun gai zerrendak deuseztatu egiten dituzte, eta ez dago zer eginik. Guk negoziatzeko borondatea daukagu, baina mahaitik altxatzera derrigortzen gaituzte. Ezin dugu jarrera inposatzailerik onartu”.
Kamarak gaineratu du itxaron zerrendak “oso handiak” direla, eta nabarmendu du langile falta dela arazoa. Hori horrela, kezkaz bizi dute COVID19ak eragindako pandemiak zer bilakaera izango duen: “Ez dakigu beste kutsadura olatu bat etorriko den edo ez, eta hori gertatzen bada, zailtasunak izango ditugu aurre egiteko". Izan ere, zehaztu du Europar Batasunean, 1.000 biztanleko 8,8 erizain daudela, eta Osakidetzan 4,8koa dela kopuru hori: “Hemengo erizainak atzerrira joaten ari dira, edota Estatuko beste leku batzuetatik etortzen zirenak dagoeneko ez dira etortzen lan baldintzengatik”.

Horri gehitu behar zaio datozen bi urteetan erretiroa hartuko duen erizain kopurua. Bere esanetan, 915 erizain erretiratuko dira Osakidetzan, eta 600 ikasle aterako dira fakultateetatik. Salatu du Osakidetzari eta Osasun Sailari “behin eta berriro” esan diotela hori, eta zenbakiek ez dutela ematen. Hori horrela, gehitu du Unibertsitateetako plazak ere handitu behar direla.
Sindikatuko kideak azaldu du OPEak deitzea berri ona dela, baina adierazi du Europar Batasunak derrigortu duela Eusko Jaurlaritza behin-behinekotasuna %8ra jaistea. Hala ere, nabarmendu du ez dakitela hori lortuko den, ”Osakidetzak ez digulako prozesuan uzten parte hartzen eta negoziatzen". Horrez gain, gezurtatu egin du lanpostu berriak sortuko direnik: “Lanpostuko horiek duela urte asko sortu ziren Osakidetzan, baina ez ziren Osakidetzaren plantillako kideak”.

Kamarak nabarmendu du mobilizatzen jarraituko dutela Osakidetzaren negoziatzeko borondatea errealitate bihurtu arte: “Arazo horiei guztiei irtenbidea eman behar zaie, eta Osakidetzak erantzunez jokatu behar du; gu elkarrizketarako eta negoziaziorako prest gaude”.

Igor Astibia Hekimeneko koordinatzailea elkarrizketatu dugu Hamaika Telebistan. Eusko Jaurlaritzak euskarazko hedabideetara bideratzen dituen bi deialdiak izan ditu hizpide; horietako bat duela urte askotatik martxan dagoena da, eta bestea pandemiaren ondorioei aurre egiten laguntzeko banatutako sei milioi euroko partida. Astibiak adierazi du sei milioi euro horiek “era desorekatuan eta desegokian” banatu direla, euskarazko hedabideek sei milioi horietatik milioi erdi soilik jaso dutelako.

Arkaitz Antizar CCOOko Gipuzkoako lurralde arduraduna elkarrizketatu dugu Hamaika Telebistan. Antizarrek nabarmendu du lan arloan “urte gatazkatsua” izango dela 2023. urtea; izan ere, ezinbestekotzat jo du hitzarmen kolektiboetan iazko KPIa bermatzea, baina salatu du patronalaren jarrera “gogorra” izaten ari dela.

Inaxio Oiarzabal Sareko bozeramailea elkarrizketatu dugu Hamaika Telebistako 'Gurean Gaur Magazinean'. Oiarzabalek manifestazioaren balorazioa “positiboa” egin du, eta nabarmendu du “oso pozik” daudela larunbat goizean Euskalduna jauregian, zein arratsaldean Bilboko kaleetan emandako irudiarekin.